Petroleumsgeologi

Petroleumsgeologi er den delen av geologien som omfattar danning og migrasjon av petroleum (olje og gass). Det omfattar òg danning av og eigenskapar ved bergartar som er sentrale for petroleumsfeller.

Olje og gass blir danna av dyre- og planterestar som fell til havbotnen og blir overlagra av anna materiale.

Omdanninga til petroleum skjer når det organiske materialet blir utsett for høgt trykk og temperatur over lang tid. Då blir det danna kjeldebergartar som byrjar leke petroleum oppover gjennom bergartane over.

For at det skal ende som eit petroleumsreservoar, trengst ein porøs bergart med ein tett bergart over, i området ovanfor kjeldebergarten. Den porøse bergarten er reservoarbergarten, og den tette blir kalla takbergart. Takbergarten stansar olja/gassen som blir fanga i ei felle.