Loggeverktøy

Når vi skal undersøkje ein brønn og bergartane han er bora gjennom, bruker vi fleire ulike loggeverktøy.

Loggeverktøya blir monterte saman og festa i ein kabel (wireline) eller i nedste del av borestrengen. Loggeverktøyet blir deretter senka ned i brønnen og sender ut lydsignal eller bruker radioaktive strålingar til å innhente informasjon. Signal blir tekne imot i eit punkt i verktøyet. Det ein måler, er som regel styrken på svaret eller tida det tek før svaret kjem tilbake. Svara blir gjorde om til forståeleg informasjon i dataprogram og presenterte som teikningar og i tabellar.

Ved å logge ein brønn kan vi innhente informasjon om tettleiken og porøsiteten til bergartane og kva type væske (vatn, olje og gass) det er i porene i bergarten. Med loggeverktøy kan vi dessutan innhente informasjon om dei indre delane av og retninga til brønnen.