Forklaringsartikkel

BHA

Ein borestreng som består av verktøy og borerøyr. Nedst er borekrona og loggeverktøy, som er skrudde saman til ein BHA. Illustrasjon. — Bilete: Baker Hughes Inc / CC BY-SA 4.0

BHA er ei forkorting for engelsk "Bottom Hole Assembly" og blir uttalt b-h-a. Ordet blir brukt om utstyret som blir montert nedst i ein bore- eller brønnservicestreng.

Ein BHA er ei lengd med samanskrudde røyr og brønnverktøy. Lengda kan vere opp mot 15 meter. Utstyret i ein BHA blir brukt til ulike oppgåver i brønnen, t.d. boring, logging, måling, perforering, plugging, vasking o.l.

Til ein brønnaktivitet bruker ein fleire BHA-ar, som blir laga på verkstaden på land og sende offshore. BHA-en blir lagd ut på røyrdekk før han skal køyrast inn i brønnen. Der blir han sjekka mot teikningar og mål som er gjorde på land, før utstyret blir plukka opp og køyrt inn i brønnen.

BHA-en blir montert nedst i ein arbeidsstreng av borerøyr, kabel (wireline) eller kveilerøyr (coiled tubing), som blir brukt til å køyre BHA-en inn i brønnen.

Forklaringar