Brønnhovudet

Brønnhovudet er det øvste punktet i konstruksjonen av brønnen. I brønnhovudet festar vi alle casingane som blir brukte til å byggje brønnen, og oppå brønnhovudet monterer vi ventiltreet for produksjonsbrønnen.

Brønnhovudet er ein stor stålring (vanlegvis ein indre diameter på 18 ¾ tommar). Han har riller på utsida, som blir brukte til å låse fast ventiltreet. På innsida er det ein skråkutta kant og riller som blir brukte til å feste neste casingdimensjon.

Brønnhovudet blir sveisa på toppen av 20 tommar casing som blir køyrd i brønnen. Når casingen er sett og sementert, kan BOP-en setjast på toppen av brønnhovudet og danne ein tett barriere i brønnen. Når brønnen er ferdig bora og skal kompletterast, blir BOP-en skifta ut med eit ventiltre som ny barriere for produksjonsbrønnen.