Skyvemasttruck T2

Ein skyvemasttruck er kjenneteikna ved at han kan flytte pallen i ulike posisjonar ved å flytte masta att og fram i lengderetninga. Fordelen med dette er at trucken bruker mindre plass når han skal hente ned og setje pallar inn i lagerreolar. Når ein kan «skyve» og «dra» pallen ut og inn mens trucken står i ro, treng ein mindre plass til å manøvrere trucken.

Føraren sit på tvers av køyreretninga. Dette sparer også plass og gir god oversikt. Skyvemasttrucken er ein støttebeinstruck og er smidig nok til å operere i tronge område mellom lagerreolar. Han har elektrisk drift, og bruksområdet er på innandørs lager.