4/3-ventil

Ein 4/3-ventil har fire portar eller tilkoplingar inn og ut frå ventilen og tre rom eller posisjonar vi kan setje ventilen i. På biletet ser vi korleis det er mogleg å skifte posisjonar med ein handspak.

Vi kan no styre ein sylinder ved å velje posisjon for ventilen som styrer olje under trykk ut til sylinderen. Deretter kan vi anten stoppe rørsla ved å setje spaken til midtposisjon, eller vi kan velje den andre posisjonen på ventilen for å styre oljetrykket den andre vegen ut til sylinderen, slik at sylinderen gjer motsett rørsle.

Ein 4/3-ventil er svært vanleg i bruk. Vi snakkar ofte om ope og lukka senter. Det betyr at i dei tre romma eller posisjonane til ventilen kan midtstillinga vere open tilbake til tanken eller lukka. Ved lukka stilling står det høgtrykk på ventilen.