Jobb med symbol i bilete og film
Korleis har Munch brukt fargar som symbol på kjensler i måleriet Skrik? Diskuter med ein medelev.
Korleis har Munch brukt fargar som symbol på kjensler i måleriet Vampyr? Diskuter med ein medelev.
Skriv ein samanhengande tekst på cirka 200 ord der du samanliknar bruk av fargar som symbol på kjensler i måleria Skrik og Vampyr av Edvard Munch.
Strukturer teksten med ei innleiing der du presenterer kunstnaren og begge måleria kort før du samanliknar.
Skrik av Edvard Munch
Vampyr av Edvard Munch
Modelltekst
Oppgåve: Skriv ein samanhengande tekst der du samanliknar korleis ein illustrasjon frå boka Norske Folkelivsbilleder og måleriet Brudeferd i Hardanger bruker symbol for å framheve det nasjonalromantiske.
Illustrasjon henta frå boka Norske Folkelivsbilleder av Tidemand, Adolph og gitt ut av Chr. Tønsberg (Christiania, 1858)
Brudeferd i Hardanger av Tidemand og Gude
Svaret:
Brudeferd i Hardanger blei måla av Adolph Tidemand og Hans Gude i 1848. Måleriet viser ein trebåt med eit nygift par og nokre av gjestene deira. I tillegg sit ein mann bakarst i båten og speler på ei fele, mens ein annan mann står oppreist og skyt i veret. Landskapet rundt viser eit typisk norsk landskap frå Hardanger, vest i Noreg, med store, snøkledde fjell og ein trong fjord. Fargane som er valde, er varme, brungrøne fargar.
Det andre biletet er henta frå boka Norske Folkelivsbilleder, 1858 og er måla av Adolph Tidemand. Biletet viser fleire unge budeier på ei seter saman med fleire typiske norske gardsdyr, som sauer og kyr. Budeiene er unge, blonde og kledde i bunad. Fargane som er mest brukte er i brungrøne tonar med litt raudt i øvste del av bunadene.
Det er fleire likskapar i korleis det nasjonalromantiske er brukt som symbol på det typisk norske i bileta. I begge bileta har personane på seg bunad, som er eit klesplagg som symboliserer norsk identitet og stoltheit. Den norske naturen blir også ofte brukt som eit symbol på det nasjonalromantiske. Brudeferd i Hardanger viser norske fjordar og fjell, mens biletet frå Norske folkelivsbilete viser typisk natur på ei norsk seter. Bunaden blir vist fram som eit kvardagsplagg i Norske Folkelivsbilleder i motsetning til i Brudeferd i Hardanger der bunaden blir brukt som festplagg. I begge bileta blir likevel bunaden brukt symbolsk for å vise det ekte norske.
Fortel om eit anna kunstverk og symbolbruken i det til ein medelev.
Vel deg eit kunstverk, gjerne frå eit anna land. Det kan til dømes vere eit måleri, eit fotografi, ein film, eit dikt, ein song eller utdrag frå ein roman.
Biletboka Sinna Mann av Gro Dahle kom ut i 2003. Regissøren Anita Killi har laga ein kortfilm av boka. Filmen handlar om den vesle guten Boj som bur i ein heim der far slår mor.
Kva kan den svarte skuggen som kjem ut av faren til Boj symbolisere? Grunngi svaret ditt
Legg merke til bollen med tre fiskar i. Kva for personar i Sinna Mann kan dei ulike fiskane symbolisere? Grunngi svaret ditt.
Den svarte fisken lagar ei boble som sprekk i overflata på fiskebollen, altså heilt øvst i vatnet. Kva kan det at bobla sprekk symbolisere? Grunngi svaret ditt.
Korleis blir fargar brukte for å symbolisere ulike kjensler i filmen? Grunngi svaret ditt.
Symbola som er brukte i kortfilmen Sinna Mann, påverkar korleis vi opplever at den vesle familien har det. Forklar korleis dei påverkar oss.
Relatert innhald
Jobb med det språklege verkemiddelet "symbol" i bilete og film og sjå kva symbola fortel oss.