Puré og stappe

Ei stappe eller mos er ofte grov i konsistensen og er ikkje køyrd saman i ein blender. Dette passar til "grovare" retter som saltkjøt, pinnekjøt og knokar og er då ofte mettingsgarnityret.

Ein puré eller ein krem er ofte silkemjuk og blir dandert fint på tallerkenen. Kok, bak eller steik grønsakene møre og køyr dei i ein blender saman med fløyte, smør eller mjølk til pureen er glatt og fin i konsistensen. Ofte er ein puré/krem ein del av fleire grønsaksgarnityr i ein rett.

Slik lagar du kålrotstappe

1. Reins og vask kålrot. Del ho deretter i bitar.
2. Kok kålrotbitane i lettsalta vatn til dei er møre. Sil av vatnet og set kjelen tilbake på kokeplata for å dampe bort det siste vatnet.
3. Mos den kokte kålrota med ein stappar eller stavmiksar, og rør inn smør og gjerne kokesjy frå den kjøtretten stappa skal serverast til. Om du ikkje har det tilgjengeleg, kan du tilsetje mjølk. Mos til ønskt konsistens. Det er viktig å ikkje tilsetje for mykje væske, spe heller meir til slutt.
4. Smak til med salt og pepar og eventuelt andre krydder, som muskat.

Slik lagar du sellerirotkrem

1. Reins og vask 300 g sellerirot, skjer ho i små skiver, og kok saman med 3 dl mjølk og 2 dl fløyte. La dette småkoke til sellerien er heilt mør.
2. Sil av væska og køyr saman sellerirota i ein blender. Spe inn kokevæska til du får ein glatt og fin konsistens.
3. Tilsett 1 ms smør og smak til med salt og pepar.

(Gausdal, 2015, s. 322)

Når vi lagar variantar av mosa grønsaker, er det mest vanleg å koke grønsaka mør, tilsetje væske og mose dette til ønskt konsistens. Ved å variere tillagingsmetode, type væske og urter/krydder får vi spennande smaksvariantar av mosa grønsaker.

Tillagingsmetode

Ved å steikje grønsaksbitar i panne eller omn til dei er møre, får vi ut meir søtleik, og vi får eit meir smakfullt garnityr etter at dette er mosa saman med væske og smak. Å bake heile grønsaker i omn gir ei grønsak med mykje smak. Kombinerer vi dette med gode smakar og eigna væske, får vi ein smakfull variant av mosa grønsaker.

Væske og smak

Å koke grønsaker i mjølk, fløyte eller kraft set meir smak på det ferdig mosa garnityret enn å koke i berre vatn. Vi sper då grønsaka med den smakfulle kokevæska. For å få meir smak i den mosa grønsaka er det ofte ein fordel å brune smøret og/eller tilføre ulike urter/krydder i smøret før vi tilset og mosar det saman med grønsaka.

Slik lagar du krem av steikt blomkål

1. Fjern det grøne på blomkålen. Del opp resten, inkludert stilk i bitar. Fres dette i ei varm panne saman med litt sjalottlauk og smør eller olje. Blomkålen skal få litt farge og lukte godt.
2. Kok blomkålen i fløyte og mjølk til han er mør.
3. Sil av væska og mos blomkålen i ein kraftig blender. Spe inn væska til du får ein glatt og fin konsistens. Smak gjerne til med litt bruna smør, salt og pepar.

Gausdal, T. V. (2015). Kokkelære: Den store kokeboka. Forlaget Press.