Lauk er opphavleg frå Asia. Det er ei grønsak som er enkel å dyrke, og som veks villig over store delar av verda. Lauk inneheld antioksidantar og protein. Kostfiberinnhaldet er høgt, og det hjelper deg med å regulerer tarmen og halde deg mett lenger etter eit måltid.
Smak på lauken!
Eit forsøk du kan gjere, er å ta ein bit rå lauk i munnen og la han liggje der til han byrjar å bli broten ned av spytt. Kva skjer med smaken på lauken etter fem minutt?
Lagring og skrelling av lauk
Lauk er lagringsdyktig og kan klare seg i over eitt år viss han blir riktig lagra. Du finn eit stort utval av lauk, alle med sine eigne bruksområde og moglegheiter. Når du handsamar lauk, må du passe på å utnytte heile råvara. Prøv å skrelle bort minst mogleg.
Skrell lauken ved å ta av botnen først. Så dreg du skalet oppover mot toppen av lauken. Hugs å halde toppen heil, då held lauken seg lenger fordi han ikkje byrjar å gasse og dermed ròtne. Så dette er eit godt tips om du ønskjer å skrelle lauk og oppbevare han før neste steg i tillaginga.
Oppskrifter
Lauk blir søtare og mildare i smaken ved varmebehandling. Vi har valt å vise dykk tre ulike måtar å lage til lauk på. Her nyttar vi kepalauk, men du kan sjølv teste ut andre lauksortar med dei same tillagingsmetodane.
Karamellisert laukskive
Karamellisering på middels temperatur i ei steikjepanne til du har fått eit dekorativt mønster på laukskiva, startar ei omdanning frå sterk smak på lauken til ein søtleg smak. Dette er eit fint garnityr som kan lagast i god tid på førehand, og du kan lett lage klar garnityret for vidare bruk.
Ingrediensar
2 lauk
solsikkeolje
salt og pepar
olivenolje
sitron
Framgangsmåte
Skrell lauken og skjer av botnen og toppen. Hugs at du må ta vare på dette avskjeret og nytte det til til dømes kraft eller supper.
Skjer lauken i cirka 8 mm tjukke skiver.
Forvarm ei panne. Steik laukskivene på den eine sida i litt solsikkeolje til dei blir skikkeleg karamelliserte. Press gjerne ned med ein steikjespade slik at fargen blir jamn på heile laukskiva.
Legg laukskivene over på eit steikjebrett med den steikte sida opp, krydre med salt og pepar. Ha over 1 ts olivenolje per laukskive. Bak i omnen på 200 gradar i 6–7 minutt.
Riv over litt friskt sitronskal og skvis på litt sitronsaft før servering.
Lauk bakt på salt
Det å bake heil lauk vil få fram den unike søte og konsentrerte smaken av lauk. Det blir danna mykje smak i prosessen, og lauken beheld den fine forma si.
Ingrediensar
grovsalt
4 lauk, medium til små i storleik
smør
flaksalt
graslauk
Framgangsmåte
Set lauk med stilkfestet ned på ei seng av salt. Bak i omn på 150 gradar i cirka 30 minutt.
Ta ut og la han kjøle seg litt ned. Skjer av toppen med ein skarp kniv eller ei saks. Losne skalet forsiktig og ta ut den bakte lauken. Skalet kan nyttast til å farge egg ved å ha det med når du koker egget.
Del lauken i fire, men ikkje skjer heilt gjennom. Då kan du opne opp lauken, og han vil sjå ut som ein blomster.
Smelt smør og ha i graslauk. Ha smøret over lauken og dryss på litt flaksalt. Då har du ein fin "laukblomster" som kan nyttast som ein eigen rett eller som garnityr til grilla rettar av kjøt og fisk.
Fritert lauk
Fritert lauk kjem i mange variantar. Her har vi valt ein som er enkel å lage, og som gir deg eit sprøtt element til ein rett. Den sprø lauken smaker svært søtleg. Derfor er det fint med litt salt for å balansere smaken.
Ingrediensar
frityrolje (solsikke eller raps)
ringar av kepalauk
maisenna
flaksalt
pepar
Framgangsmåte
Skjer 3–4 mm tjukke laukringar.
Ha maisenna i ein bolle. Bland i salt og litt pepar. Vend ringane i maisennablandinga, og friter på 165 grader til dei er gylne.
La ringane renne av seg på papir. Salte og pepre litt før servering. Dette passar fint som sprøtt garnityr til ein rett.