Pannesteiking av grønsaker

Ved sida av koking er vel pannesteiking den vanlegaste tillagingsmetoden for grønsaker. Riktig varme i panna, bruk av olje/smør, riktig storleik på grønsakene og salt/krydder vil påverke resultatet. Føremålet med pannesteiking er å få ei god steikjeskorpe som gir grønsakene smak.

Sjå denne filmen frå 3.25 for å sjå korleis du pannesteikjer blomkål.

Å sautere betyr å "riste" eller "hoppe" på fransk, og ordet blir nytta om å brune noko raskt. Omtrent på same måte som ved woking. Ofte brunar vi grønsakene i ei sautépanne. Ho liknar på ein kasserolle, men har skrå kantar som gjer at ho ser litt ut som ei mindre wokpanne.

Når vi sauterer, gir vi grønsakene ei rask varmebehandling i ei varm panne. Grønsakene skal ikkje få ein mørk steikeoverflate, men vere al dente, som betyr at dei gir litt tyggemotstand. Sautering bør skje like før servering, og det kan vere ein fordel å blansjere grønsakene først.

Ei wokpanne er forma slik at vi kan lage til grønsaker raskt på høg varme. Ho er vid og gjer det enkelt å "kaste" grønsakene rundt i panna slik at dei ikkje blir brende. Riktig kutteteknikk på grønsakene er viktig for å få eit godt resultat. Det er viktig at alle grønsakene blir likt kutta, og at grønsaker med same konsistens blir steikte saman. Eit døme på dette er paprika og squash som blir varmebehandla i kortare tid enn til dømes rotgrønsaker.

Dei fleste forbind grilling med sommar og varme og grilling utandørs. I dei fleste profesjonelle kjøkken finst det grillpanner. Dei er tjukkare, ofte med riller, og er som oftast laga av jernmateriale. Ved grilling blir det nytta direkte varme, og i motsetning til ved wok og sautering skal vi ikkje få bruningseffekt ved at grønsakene blir "kasta" i lufta. Dei ligg på varmen til dei får farge og ønskt smak. Vi kan varmebehandle dei fleste grønsaker på grill, anten som heile grønsaker eller i strimlar/bitar.

Denne filmen viser grilling og sautering av grønsaker.