Av- og påkleding

Det kan vere ulike grunnar til at nokon har behov for hjelp og støtte til av- og påkleding. Den medisinske tilstanden til personen kan føre til at dei har fysiske og/eller motoriske avgrensingar som påverkar evna til å kle av og på seg sjølve.

Når du skal hjelpe til med å velje klede, er det viktig å velje klede som er praktiske å kle av og på. Du bør velje klede som er romslege og enkle å ta på, dersom pasienten eller brukaren har nedsett rørsle eller smerter.

Det er nødvendig at du tilpassar hjelpa ut frå dei behova den enkelte har. Vi må hugse på at vi òg varetek verdigheita og komforten til pasienten eller brukaren når vi hjelper til med av- og påkleding.

Tilpassa hjelp ved av- og påkleding

• Ha god tid.

• Legg til rette slik at personen kan gjere mest mogleg sjølv.

• Start påkleding på den minst rørlege sida.

• Start avkleding på den mest rørlege eller minst smertefulle sida (dette gjeld både arm og bein).

Hjelpemiddel som skohorn, på- og avtrekkjar for strømper, glidelåshjelp, knappekneppar og liknande bidreg til at pasienten eller brukaren kan klare å gjere meir sjølv. Hjelpemiddelsentralen eller ein ergoterapeut kan gi råd om kva hjelpemiddel som finst for å gjere av- og påkleding lettare.