Vanlegvis handlar dagleg hårpleie om å greie eller børste håret. Hårvask skjer vanlegvis når brukaren dusjar. Bruk av tørrsjampo kan òg vere ein del av den daglege hårpleia.
Etter hårvasken ønskjer nokon å rulle opp håret eller å få det stelt på ein bestemd måte. Viss brukaren ønskjer det, bør håret klippast og stellast av ein frisør.
Observasjon av hår og hovudbotn høyrer med til oppgåvene til helsefagarbeidaren i samband med hårvask og anna stell av håret.
Hårvask i seng
Viss ein brukar er slapp og sengeliggjande over lengre tid, kan hårvask i seng vere et alternativ. Før ein utfører denne prosedyren, må ein kjenne til tilstanden til brukaren og kva moglegheiter personen har til å bevege på seg. Nokre brukarar kan til dømes ha vanskar med å bevege nakken, og då bør ein ikkje gjennomføre denne prosedyren. Vi bør vere to når vi utfører hårvask i seng.
Pass på at du støttar hovudet til brukaren godt, og sørg for at personen ligg i ei mest mogleg behageleg stilling med minst mogleg belasting. Bruk gjerne ekstra puter for å få til dette.
Nødvendig utstyr
tynn plast
to store handkle og eitt mindre
hårsjampo og balsam
eventuelt andre hårpleiemiddel
vaskefat eller plastbalje
hårvaskestativ
to vasskanner
hårbørste, kam og hårfønar
Prosedyre
Utfør prosedyre for god handhygiene.
Legg plast på madrassen.
Brukaren må liggje så langt nede i senga at du kan setje vaskefatet på madrassen. Alternativt kan du fjerne hovudgavlen, flytte brukaren langt opp i senga og setje utstyret bak hovudenden på senga.
Dekk til putene med plast og handkle.
Dekk til skuldrene, brystet og halsen med plast og handkle.
Vask og skyl håret grundig. Pass på at vatnet er temperert!
Bruk balsam eller andre hårpleiemiddel etter behov og etter ønske frå brukaren.
Tørk håret med det vesle handkleet.
Grei og stell håret etter ønske frå brukaren.
Rydd vekk utstyret.
Utfør prosedyre for god handhygiene.
Utfordringar til deg
Kor ofte vaskar du håret?
Kva har hår og hårfrisyre å seie for deg?
Kva for brukarar bør få tilbod om hårvask i seng?
Finst det tilfelle der du vil rå frå at de føretek hårvask i seng?