Del 1: La deg inspirere!
Start med å sjå videoen om gatekunst nedanfor. Ta deretter ein runde i nærmiljøet eller på nettet, og finn ulike døme på gatekunst. Sjå nærare på formuttrykk og fargebruk i kunsten, og bruk det du ser, som inspirasjon til å skape ditt eige uttrykk i eit sjølvportrett.
Del 2: Portrett
Samarbeid to og to og ta portrettfoto av kvarandre. Pass på at de finn ein nøytral bakgrunn. Eksperimenter gjerne med lyssetting.
Vel det beste portrettet. Last det inn i eit biletbehandlings-program og gjer det om til eit svart-kvitt-bilete utan gråtonar.
Jobb med å forenkle uttrykket slik at det kan danne basisen for ein sjablong.
Skriv ut ein sjablong.
Bruk kniv til å skjere bort dei svarte flatene. Det kvite som står igjen, bør vere så heilt som mogleg.
Del 3: Komposisjon
Lag små, raske skisser der du prøver ut ulike plasseringar av portrett og skriftleg tekst.
Del 4: Bakgrunn
Eksperimenter med fargar og måleteknikkar og lag ein bakgrunn som du vil trykke portrettet ditt på.
Del 5: Pseudonym
Eit pseudonym er eit oppdikta namn. Du kan bruke det som dekknamn viss du ikkje ønsker å gi opp det eigentlege namnet ditt.
Individuelt arbeid
Lag ei liste:
fornamn, mellom- og etternamn
initialane dine
kallenamn (om du har)
namn på staden der du bur eller kjem frå
noko du synest er vakkert
noko du synest er skummelt
eit ord du bruker ofte
nokre ord som er typiske for dialekten din
tre ord som karakteriserer deg
favorittsong
det første symbolet du kjem på
Samarbeid i grupper på fire
No skal de lage forslag til pseudonym for kvarandre:
Ta for dykk lista til ein av gruppemedlemmene.
Bruk ord, bokstavar og symbol på lista til å lage forslag til pseudonym.
Jobb raskt – bruk ikkje meir enn eitt minutt.
Kvar gruppemedlem lagar minst tre ulike forslag.
Ta så for dykk neste liste, osb.
Individuelt arbeid
No har du ei liste med minst ni forslag. Bruk dei som inspirasjon til å skape ditt eige kunstnarnamn eller pseudonym.
Lag skisser og prøv ut ulike måtar å skrive pseudonymet ditt på.
Jobb vidare i eit grafisk program og prøv ut ulike skrifttypar. Kva vil du at fonten skal formidle – eit tøft, vakkert, leikent, sinna, kult eller morosamt uttrykk?
Skriv ut namnet i passande storleik, og lag eit forslag til tekstsjablong.
Test ut ulike fargar, og trykk namnet med måling på portrettet ditt.
Del 6: Skriftleg tekst
Ønsker du å ha med eit sitat, eit slagord eller ein tekst som utvidar betydninga av biletet ditt?
Eksperimenter på same måten som i del 3, og trykk teksten på portrettet ditt.
Del 7: Utstilling
Samarbeid om å lage ei utstilling av alle sjølvportretta.
Del 8: Dokumentasjon
Samle alle skisser og utprøvingar i ei mappe. Skriv eit refleksjonsnotat der du vurderer desse punkta:
Korleis har du latt deg inspirere av gatekunst?
Kva har du eksperimentert med, og kva for nokre ulike måleteknikkar har du brukt?
Korleis har du brukt sjablongteknikken?
Kva er det sjølvportrettet uttrykker om deg? Korleis er val av fargar og skrift med på å forsterke dette uttrykket?
Kva er du mest fornøgd med i arbeidet ditt?
