Du skal lage ein parykk i kvitt papir. Parykken skal passe til ditt eige hovud. La deg inspirere
av barokk eller rokokko. Vel eit element frå tidsepoken som skal vere med som ein detalj i
parykken din. Fotografer eksperimenteringa, arbeidsprosessen og det ferdige produktet.
av barokk eller rokokko. Vel eit element frå tidsepoken som skal vere med som ein detalj i
parykken din. Fotografer eksperimenteringa, arbeidsprosessen og det ferdige produktet.
Utforsking
Lær om stilperiodane
- Kva kjenneteiknar barokken?
- Korleis var kles- og hårmoten i barokken?
- Kva kjenneteiknar rokokkoen?
- Korleis var kles- og hårmoten i rokokkoen?
- Kven var Marie Antoinette av Frankrike?
Vi tilrår å sjå filmen Marie Antoinette, som blei regissert av Sofia Coppola i 2006.
Prøv ut ulike teknikkar i papir
Eksperimenter med papir, og fyll ut eit A3-ark med 12 spennande teknikkar. Fotografer eksperimenteringa di.
Idéutvikling og planlegging av arbeidet
- Vel om du vil la deg inspirere av barokken eller rokokkoen. Lag eit moodboard med inspirasjon frå perioden.
- Finn eit element frå perioden som du vil bruke i arbeidet ditt.
- Teikn skisser av korleis du vil at parykken din skal sjå ut. Tenk heilskap mellom: parykk og element frå tidsepoken; form og tekstur; kontrast, balanse og rytme.
- Planlegg arbeidet ditt. Korleis vil du jobbe etter at du har laga berekonstruksjonen?
Gjennomføring
Bølgepapp kan gi ei stabil form. Bruk pappen til å lage ein berekonstruksjon. Hald fram med kvitt kraftpapir (eller anna tjukt papir som dekkjer godt.)
- Lag ein base i papp, tilpassa hovudet ditt. Start med omkrinsen kring hovudet, og bygg opp den forma du vil ha på parykken.
- Start med å dekorere nede i nakken, ved øyra og panna, og jobb deg oppover mot toppen av hovudet.
- Vurder arbeidet undervegs opp mot idéen din. Gjer dei endringane som må til, for å få heilskap i arbeidet ditt.
- Til slutt set du inn detaljen du har laga.
Hugs å fotografere heile arbeidsprosessen!
Dokumentasjon
Bli einig med læraren din om korleis du skal levere eller presentere dokumentasjonen.
Dette skal vere med i dokumentasjonen:
- Svar på spørsmåla om barokk og rokokko i utforskingsdelen
- A3-arket med eksperimentering i papir
- Moodboard med inspirasjon
- Skisser til parykken
- Foto og kort tekst eller stikkord frå arbeidsprosessen
- Foto av ferdig produkt med eit element eller ein detalj frå barokk eller rokokko
- Foto av deg med parykken på
- Eigenvurdering av arbeidsprosessen og det ferdige produktet
Tips til variasjon av oppgåva
Viss de ønskjer å jobbe med fargebruk samtidig, kan de kombinere kvitt med pastellfarga papir.
Kjelde:
Nasjonalt senter for kunst og kultur i opplæringen. (2017). Papirparykk og porselenssmykke. Henta 8. januar 2020 frå: https://kunstkultursenteret.no/ressursbase/papirparykk-og-porselenssmykke/
Relatert innhald
CC BY-SASkrive av Inger Gilje Sporaland, Hanne Merethe R. Staurland og Nina Berg Hereid.
Sist fagleg oppdatert 08.01.2020