I mange samanhengar kan det verke opplagt at vi kjem til å sjå tilbake på tida vi lever i no som miljø-epoken. Heilt sikre kan vi likevel ikkje vere før vi ser ei god stund tilbake i tid. Vi kan ha eit retrospektivt blikk på den greske antikken eller art nouveau, men det er ikkje mogleg å ha det på vår eiga tid. Derimot går det an å late som.
Oppgåva
Samarbeid gjerne i grupper. De står dessutan fritt til å dikte opp innhald som de blandar med fakta.
1. Forarbeid: Diskuter og forstå
- Diskuter og forstå kva ein epoke er, og kva ei stilretning er.
- Kom med konkrete eksempel på tidlegare historiske epokar og stilretningar.
- Vel ein eller to stilretningar de bruker som referanse.
2. Hovudarbeid: Utforsk, finn opp og beskriv
Tenk dykk at de er i framtida og ser tilbake på vår tid. Ho blir kalla for miljø-epoken. Korleis var den tida?
- Kva var folk opptekne av?
- Kva sa og gjorde politikarane?
- Kva kjenneteikna den teknologiske utviklinga? Kva var typiske estetiske kjenneteikn ved medieuttrykk, stiluttrykk, kunstverk og arkitektur?
Finn opp ei stilretning frå miljø-epoken, og beskriv tolkinga dykkar av ho. Ta gjerne utgangspunkt i skildringar av stilretningar frå NDLA eller frå Store norske leksikon.
- Stilretninga dukka opp i ... som ein reaksjon på ...
- Skaparen av dette verket gir uttrykk for ... gjennom ...
- Ideen var å få fram ...
- Sentrale personar var ...
Kva er typiske eksempel i stilretninga dykkar? Bruk biletsøk og finn eksempel på medieuttrykk, stiluttrykk, kunstverk og arkitektur de kan bruke i skildringa.
3. Lever
Bli samde med læraren om kor lang skildringa skal vere, fordeling av arbeid i gruppa og tidsfristar.
Nyttige spørsmål å ta med i arbeidet
- Verkar stilretninga dykkar truverdig? Har de gode eksempel og logiske forklaringar? Om nødvendig, test ut på andre grupper og gjer justeringar.
- Skriv de godt? Les høgt for kvarandre, juster ordstillingar der det trengst, og kort ned lange setningar.
- Brukar de fagomgrep og framandord riktig? Ta ein sjekk på andre, og forklar nærare der det er nødvendig.
- Skriv kjeldelister for faktakjelder de har brukt.
Kilde
Persvold, A. Z. (2019, 26. februar). Epoke. I Store norske leksikon. Henta 19. mars 2020 frå https://snl.no/epoke
Relatert innhald
Nettside hos snl.no