Kjemiske sansar
Mens luktecellene i slimhinna til nasen er kjenslevare for molekyl i gassform, blir smakscellene i slimhinna til tunga stimulerte av smaksstoff oppløyste i vatn.
Smakssansen
Vi har omtrent 10 000 smakslaukar, og kvar smakslauk inneheld 50–100 smaksceller, men talet på smakslaukar blir redusert med alderen. Smakscellene er spesialiserte til å reagere på éin av fem ulike smakskvalitetar: surt, salt, søtt, bittert og umami, og kvar smakslauk inneheld smaksceller for alle fem smakskvalitetane.
Smakssansen er spesielt kjenslevar for bitre stoff. Sidan dei fleste plantegiftene smaker bittert, vil sensibiliteten vår for bitre stoff hjelpe oss til å unngå forgiftingar.
Luktesansen
Luktesansen er sannsynlegvis den første sansen som oppstod i dyreriket. Han styrer livsviktige prosessar som matsøk, partnarval og faresignal hos mange dyr.
Luktesignal som når hjernen, har direkte samband til kjensler og minnet. Vi har millionar av luktnevronar i nasehola. Det er desse som reagerer på luktstoff.
Smaker du forskjell på eple og lauk?
Både smakssansen og luktesansen hjelper oss til å skilje mellom ulike smakar.
Framgangsmåte
Jobb i par med øvinga.
Ta på deg bind for auga og klype over nasebora.
Stikk tunga ut og pust gjennom munnen.
Be partnaren din om å plassere ein bit lauk eller eple på tunga di.
Trekk tunga inn i munnen, men ikkje tygg. Kan du kjenne igjen biten? Beskriv smaken.
Ta vekk klypa frå nasen og pust djupt. Klarer du no å kjenne kva det er? Kan du forklare det som skjer?
Tenk gjennom og prøv å forklare kva som skjer frå ein smak eller lukt treffer ei sansecelle, til vi registrerer smaken eller lukta.
Forklaring
Lukt har mykje å seie for det vi opplever som smak. Når maten blir toggen, blir det frigitt aromastoff som kjem opp i nasehola frå svelget og påverkar luktecellene.
Når vi er forkjølte, blir smakssansen dårleg. Det er fordi luktecellene blir dekte av meir slim enn vanleg, slik at luktesansen blir redusert. Viss vi set ei klype over nasen, hindrar vi lukter i å komme opp til luktecellene i nasehola. Derfor er det vanskeleg å smake forskjell på eple og lauk.
Tips til læraren
Her kan du utfordre elevane om kva som er smak, og kva som er lukt, og kvar er det eigentleg vi luktar og smaker? Samspelet i hjernen kjem godt fram i denne øvinga.
Utviding av øvinga
Læraren kan òg lage fire ukjende løysningar a, b, c og d som ser like ut og smaker surt, søtt, salt og bittert. Elevane skal så smake og finne fram til kvar på tunga desse smakane kjennest tydelegast. Bruk gjerne bomullspinnar til å dyppe i løysningane.
OBS!
Kvar smakslauk inneheld smaksceller for alle dei fem smakskvalitetane og er ikkje spesialisert til å registrere ett bestemt smaksinntrykk. Sjølv om smakslaukane i eit gitt område av tunga kan vere særleg kjenslevare for éin av dei fem typane av smaksstoff, reagerer dei som regel òg på éin eller fleire av dei andre typane.
Det mange av oss har lært om at dei ulike smakane blir registrerte på kvar sine bestemde område på tunga, stemmer altså ikkje.
Kjelder
Jansen, J. K. S. & Glover, J. (2022, 20. mai). Smakssans. I Store norske leksikon. https://sml.snl.no/smakssans
Grønlien, H. & Tandberg, C. (2009, 21. august). Øvelser i sansefysiologi. Skolelaboratoriet i biologi, UiO. https://www.mn.uio.no/ibv/om/skolelab/kompendier/ovelser-i-sansefysiologi.PDF