Celler er byggjesteinane i alt levande, frå enkle eincella organismar til meir komplekse organismar som oss menneske. Kunnskap om celler er derfor heilt sentralt i biologi. Her skal du få innsikt i mange av dei fascinerande og livsviktige prosessane som går føre seg i og mellom cellene.

Cella er den grunnleggjande eininga for alt liv. Sjølv virus er avhengig av celler for å kunne formeire seg. Alle levande organismar består av éin eller fleire celler. Trass i stor variasjon har cellene nokre fellestrekk i oppbygning og indre struktur som dannar grunnlaget for funksjonen deira.