Leik med streken

Kort instruksjonsfilm kjem.

Her skal du slå deg laus og skikkeleg rable på arket. Prøv ut blyantane med ulikt trykk på streken. Slik øver du på å bruke blyanten og finne ut av alle eigenskapane han har. Dette er ei viktig øving og er grunnleggande for arbeidet ditt vidare.

Det kan lønne seg å teikne litt raskt, men prøv deg fram. Tempo på teikninga heng saman med kva du skal gjere. Her kan det lønne seg å halde midt på blyanten og gjerne litt laust.

No skal du variere trykket på blyanten i ein og same strek og berre teikne strekar på eit skissepapir. Øv deg på å variere trykket på blyanten. Teikn først raskt med raske rørsler. Hald litt oppe på blyanten med eit laust grep.

Tren på å lage strekar ved å ha eit jamt trykk på blyanten. Studer kva eigenskapar strekane frå dei ulike blyantane har.

Du vil sjå at det oppstår ein tredimensjonal effekt ved å jobbe på denne måten. Etterpå skal du teikne sakte. Då lærer du ekstra godt dei ulike blyantane å kjenne. I tillegg får du det å jobbe med strek "inn i handa".

Opne bilete i eit nytt vindauge

CC BY-NC

Bilete: Annlaug Auestad

No skal du jobbe meir systematisk med utprøvinga av teikneblyantane og grafittstiften. Prøv ut kva som skjer med streken når du fokuserer på dei ulike punkta under:

Grep

• Hald ned mot spissen av reiskapen når du teiknar. Dette er best når du skriv og skal lage fine detaljar.

• Hald på midten av reiskapen. Då får du lause og ledige strekar som blir lettare å kontrollere over lengre "strekk".

• Hald oppe på reiskapen. Dette fungerer best for store rørsler på stort ark.

Retninga på streken

• Prøv å skyve streken frå deg.

• Etterpå dreg du streken mot deg.

Trykk på streken

• Korleis skaper du ein tung og fyldig strek?

• Korleis kan du få til ein lett, tynn strek?

• Kva skjer om du varierer trykket i ein og same strek?

• Prøv å lage ein jamn strek ved hjelp av eit jamt trykk.

Tempo

• Prøv å lage sakte strekar.

• Etterpå testar du ut raske strekar.