Valør
Valørar mellom kvitt og svart
Dei ulike gråtonane har ulik lysheit, og vi kallar gråtonane mellom kvitt og svart for valørar. Vi kan dele gråtonane inn i ein skala som går frå lyst til mørkt.
Øv deg på å skape valørar med teikneblyantane dine.
Illusjon av djupn
Valørar hjelper oss å skape ein illusjon av at noko som i verkelegheita er tredimensjonalt, blir opplevd slik også på ei todimensjonal flate. Arket er flatt og har berre to dimensjonar: vertikalt og horisontalt. Det har ikkje djupn. Bruk av valørar er eit viktig verkemiddel når du vil at ei form skal verke tredimensjonal på arket.
Lys og skugge
Du kan bruke gråtonane til å gjengi lys- og skuggeverknader. Dei lyse valørane oppfattar vi som lys når dei står saman med mørke gråtonar. Dei mørke valørane opplever vi som skuggar. Slik kan du modellere forma og plassere henne i eit rom. Skuggen som blir danna på sjølve forma, kallar vi eigenskugge, og skuggen på underlaget heiter slagskugge.
Det er ikkje berre den direkte lyskjelda som er med på å definere forma. Også indirekte lys som blir reflektert frå omgivnadene, verkar inn. Legg merke til at lyset blir kasta tilbake frå underlaget viss du set eit eple på eit kvitt ark. Dette skaper ein refleksjon på eplet. Denne refleksen kan vere med på å skape liv i teikninga di.
