Grønkål er mørkegrøn, saftig og sprø. Han har ein kraftig kålsmak og blir nytta som grønsak.
Bruksområde
Grønkål har ein relativt kraftig kålsmak. Kålsmaken kan bli litt mildare om grønkålen blir utsett for frost. Då blir karbohydrata omdanna til sukker, og smaken blir søtare. Grønkål blir nytta kokt i suppe eller stuingar. Vi kan òg smørdampe han, koke han eller steikje han, eller nytte han som pynt i staden for salat.
Kvalitetskrav
Grønkål finst i ulike variantar med ulik storleik. Det er derfor ingen kvalitetskrav til storleiken, men blada skal ha ein jamn, grøn farge og vere velutvikla og krusete. Grønkål skal òg vere saftig og fri for skadar og ha ei frisk lukt.
Næringsinnhald
Grønkål er ei svært sunn grønsak. Han er kalorifattig og rik på A- og C-vitamin. Han inneheld også kalsium og fosfor og er ei av dei grønsakene som inneheld mest jern.
Sjå Matvaretabellen frå Mattilsynet for nærare opplysningar om næringsinnhaldet.
Sjå film om korleis vi lagar til grønkål (Lise Finckenhagen for Bama).
Hugselappen
Norsk sesong:
august–desember
Med andre ord:
latin: Brassica oleracea sabellica
engelsk: kale
tysk: Grünkohl
fransk: chou frisé
Lagring:
0–2 °C. Grønkål har kort haldbarheit og eignar seg ikkje for langtidslagring.