Den mest nytta reddiken er den vi kallar for sommarreddik, som har kulerund form og raud farge. Vi har også vinterreddik, som er ein noko mindre kjend variant. Han liknar på gulrota i form og er rund og avlang med ein lysare raud farge.
Reddik har ein frisk og litt sterk smak. Dette kjem av at han inneheld sennepsolje.
Bruksområde
Reddik må først vaskast i kaldt vatn. Han kan deretter etast naturell, heil, i skiver eller kutta til salat. Reddik er godt tilbehøyr til ost og høyrer såleis til eit ostebord saman med druer, kiwi og stongselleri. Han kan også etast saman med dipp eller som pålegg, eller han kan kokast i 10–15 minutt og serverast som varm grønsak til kjøt og fisk.
Kvalitetskrav
Sidan reddik finst i ulike variantar, kan vi generelt seie at knollane skal ha fast, kvitt fruktkjøt og vere saftige. Dei må vere heile og harde utan blaute eller mørke flekker. Sommarreddik, som ofte kjem i buntar, skal ha friske, grøne blad.
Næringsinnhald
Reddik er kalorifattig og inneheld noko C-vitamin. Likevel gjer det låge forbruket at dette ikkje har nokon ernæringsmessig verdi.
Sjå Matvaretabellen frå Mattilsynet for nærare opplysningar om næringsinnhaldet.
Hugselappen
Norsk sesong:
mai–august
Med andre ord:
latin: Raphanus sativus var. sativus
engelsk: radish
tysk: Radieschen
fransk: radis
Lagring:
0–2 °C