Fruktkjøtet er kvitt med ei gulkvit mjølkesaft som piplar fram når røtene vert skrelte. Smaken er mild og god og minner om asparges. Konsistensen er hard og fin.
Bruksområde
Vi skreller skorsonerrot med ein potetskrellar før bruk. På grunn av oksygenet i lufta oksiderer fruktkjøtet raskt og vert brunt om vi ikkje legg dei skrelte røtene i vatn for å hindra det. Tilset gjerne litt sitron, mjølk, eddik eller salt i vatnet. Røtene må deretter koka i ca. 15–20 minutt, gjerne med litt fløyte, salt og pepar.
Ho kan etast varm eller kald og er nydeleg som grønsak til middag på linje med asparges eller kutta i salatar. Ho er nydeleg servert med smørsaus, til dømes hollandaise, og vert elles nytta som andre typar rotgrønsaker i supper, gryter og gratinerte retter. Skorsonerrot må ikkje etast rå.
Næringsinnhald
Skorsonerrot inneheld inulin, ein sort stive som er bygd opp av fruktose. Dette gjer at diabetikarar kan eta skorsonerrot, for vi treng nemleg ikkje insulin for å gjera oss nytte av fruktose. Røtene er kalorifattige og rike på mineral.
Sjå Matvaretabellen frå Mattilsynet for nærare opplysningar om næringsinnhaldet.
Kvalitetskrav
Skorsonerrot er ikkje vaska og har litt jord og sand på skalet. Røtene skal vera minst 20 cm lange og ha ein diameter på ca. 1,5 cm. Dei skal ikkje ha forgreiningar eller siderøter. Fruktkjøtet skal vera kvitt, friskt og ikkje seigt.
Hugselappen
Med andre ord:
Latin: Scorzonera hispanica
Engelsk: Salsify, Scorzonera
Tysk: Schwartzwurzel
Fransk: Scorsonére, Salsifis noir
Lagring:
2–4 °C. Skorsonerrot har ganske god haldbarheit. Må lagrast kjølig og gjerne pakka i plastpose.