Betydninga av vareplasseringa

I daglegvarebutikkar blir magnetvarer som mjølk og brød ofte plassert innerst inne i butikklokalet. Då må kundane gå forbi store delar av sortimentet for å kome til dei varene dei eigentleg skulle ha.

Tanken er at kundane på sin veg gjennom butikken skal plukke med seg ein del andre varer som dei eigentleg ikkje hadde tenkt å kjøpe.

I kassaområdet blir kundane ofte ståande ei stund mens dei ventar på å få betale for varene. Her plasserer ein derfor gjerne impulsvarer som sjokolade og aviser. Mens kunden ventar, kan han eller ho plukke med seg av impulsvarene. Når kundane blir eksponerte for impulsvarer, kan vi dermed få selt meir.

Ein ting som er viktig å vite, er kva varer som sel, og kva varer som berre ligg stille i hylla. Det er òg viktig å vite kva varer vi tener godt på, og kva vi tener lite på. Med andre ord må vi ha oversikt over kor mykje vi tener på dei ulike varene.

For å systematisere gir vi varene ulike namn:

Trafikkskaparar

er dei varene som får kunden til å oppsøke butikken, som til dømes mjølk og brød.

Vinnarar

er lettomsetjelege varer med god forteneste, som til dømes nye mobiltelefonar, felleski og andre bestseljarar.

Serviceprodukt

er produkt som har låg forteneste eller lågt sal, men som kundar forventar at butikken har, til dømes ekstrautstyr til eldre mobiltelefonar.

Dovne varer

er varer som har lågt sal, men høg forteneste, til dømes dyre og eksklusive koffertar i ein veskebutikk.

For å auke salet må du tenke sameksponering. Saman med trafikkskaparen bør du plassere alle produkta som kan seljast saman med denne trafikkskaparen. Dette er ikkje berre for å auke salet, men også for at kunden skal få med seg alt som trengst (og bli tilfreds). Viss du til dømes har tilbod på ei steikepanne, bør lokk og steikespade stå saman med denne.