"Ja, vi elsker" som samansett tekst

1. Skriv ei attforteljing av nasjonalsongen med eigne ord.

2. Samanlikn attforteljinga i grupper.

3. Diskuter deretter i klassen: Kor godt kjenner de innhaldet i songen?

4. Skriv opp alle momenta de hugsar på tavla.

Les og lytt til songen og diskuter desse spørsmåla i grupper:

1. Kor mykje hugsa de eigentleg av songen frå før?

2. Kva vil de seie er dei viktigaste nasjonsbyggjande motiva Bjørnstjerne Bjørnson brukar i songen?

3. Rangar forståinga dykkar av innhaldet i nasjonalsongen på ein skala frå 1–10.

4. Var det noko av teksten de ikkje forstod? Skriv i så fall ned eit par moment. Diskuter deretter i klassen kva desse delane av teksten kan bety.

No kan de velje om de vil lage ein teikneserie eller ei digital forteljing av teksten til "Ja, vi elsker". Målet er å lage eit kreativt produkt, men også å utforske teksten. For å lage illustrasjonane, må de nemleg forstå kva for historiske hendingar Bjørnson refererer til i teksten.

Eit døme:

Slik går de fram:

1. Vel sjølv om de vil jobbe åleine eller i par. "Dekonstruer" (ta for dykk bit for bit) ei og ei strofe slik at de finn ut kva for historiske hendingar Bjørnstjerne Bjørnson refererer til i songen.

2. Lag deretter ei visuell framstilling av hendingane. De vel om de vil teikne for hand, finne kjende måleri/illustrasjonar av hendingane eller bruke eit teikneprogram.

3. Kvart bilete/illustrasjon skal følgjast av teksten til Bjørnstjerne Bjørnson.

1. Vis fram forteljingane dykkar til kvarandre og fortel kva val de gjorde undervegs.

2. Diskuter om igjen: "Kva vil de seie Bjørnstjerne Bjørnson først og fremst bruker som nasjonsbyggjande motiv i songen?"

3. Rangar forståinga di av innhaldet i nasjonalsongen på ein skala frå 1–10.

Gro Dahle vann i 2002 ein uhøgtideleg konkurranse om å lage Noregs nye nasjonalsong med teksten "Norge i fløtesaus". Det er ei omskriving av "Ja, vi elsker".

1. Les gjennom songen og skriv ned det du meiner er tema og bodskap i teksten. Samanlikn deretter det du har skrive med andre i klassen.

2. Diskuter: Korleis meiner de Gro Dahle framstiller Noreg og nordmenn?

3. Kva verkemiddel bruker Gro Dahle i teksten?

Då Dahle vann konkurransen, skreiv juryen i grunngivinga at teksten er satirisk, men at han òg viser kjærleik til kongeriket Noreg.

Åleine:

1. Lag ein tabell med to kolonnar der det står "satire" som overskrift i den eine kolonnen og "kjærleik til Noreg" i den andre. Skriv deretter ned kva de meiner er satire, altså kva sider ved Noreg og nordmenn Dahle gjer narr av i den eine kolonnen, og kva sider ved Noreg og nordmenn ho viser kjærleik for i den andre.

Diskuter i plenum:

1. Kva meiner de er typisk norsk? Lag ei liste over både gode og dårlege eigenskapar ved Noreg og nordmenn.

2. Når blir de stolte over å vere norske?

3. Når blir de flaue over å vere norske?

4. Korleis hadde dykkar drøyme-Noreg sett ut?

Diskuter i grupper:

Bjørnstjerne Bjørnsons tekst er høgtideleg og søkjer til historia for å hylle Noreg, mens Gro Dahles tekst er satirisk og har nok ikkje som mål å hylle Noreg og nordmenn. Korleis kan konteksten forklare form og innhald i dei to tekstane?