Hopp til innhald
Oppgåve

Brukarvennlegheit

Kva har det å seie for kundereisa om bedrifta di har ei rotete nettside? I denne oppgåva skal du først jobbe individuelt for så å diskutere dine eigne opplevingar som kunde med dei andre i klassa.
Kvinne med eit oppgitt uttrykk i ansiktet og handflatane vende opp. Foto.
Oppgitt kunde. Bilete: master1305 / CC BY-NC 4.0

Bakgrunn

For bedrifter er det viktig at det faktisk er reisa til kunden dei tenkjer på, og ikkje si eiga salsreise, når dei kartlegg og jobbar med kundereiser. Kva avgjer kvar kunden vel å kjøpe eit produkt?

Oppgåve

I denne oppgåva skal du rette eit kritisk blikk på den tredje fasen av kundereisa, der kunden tek ei kjøpsavgjerd og deretter bedømer kjøpet. Ta utgangspunkt i to produkt du ønskjer deg eller akkurat har kjøpt. Gjennomfør den tredje fasen av kundereisa først for det eine produktet og deretter for det andre. Til slutt skal du samanlikne kundereisene dine for dei to produkta.

Del 1

Søk på Google etter informasjon om det første produktet.

  • Lag ein liten rapport med stikkord, og legg gjerne inn skjermbilete som viser positive og negative trekk ved nettstader du besøkjer.
  • Noter ned kor mange og kva for nettstader du hentar informasjon frå, kva nettstader som er best, og kvifor desse er best.
  • Kor mange stader kan du få kjøpt produktet?
  • Kva skil heimesida for produktet frå andre utsalsstader på nettet? Er heimesida betre eller dårlegare? Kvifor?
  • Kva er avgjerande for ditt val av nettstad som du vil kjøpe produktet frå?
  • Gjenta prosessen for produkt nummer to.
  • Samanlikn kundereisene dine for dei to produkta. Kva for ei reise var best, og kvifor?

Del 2

  • Presenter funna dine for dei andre i klassa.
  • Diskuter i klassa kva som er viktig for at de som kundar skal kjøpe frå ein nettstad.
  • Diskuter om de deler informasjon om produkt de har kjøpt, og kvar de i så fall deler slik informasjon.
  • Kva har ein slik delingskultur å seie for ei bedrift?
Kollasj av bilete som ligg over kvarandre. Vi ser blant anna delar av eit ansikt, ein høgtalar, og logoar og ikon for sosiale medium som YouTube, Instagram og Facebook. Illustrasjon.
Sosiale medium. Bilete: Gerd Altman / CC BY-SA 4.0

Del 3

Søk etter informasjon om korleis andre vurderer produkta du har sett på.

  • Kva skriv folk om produkta, og i kva kanalar?
  • Kor mykje har det andre meiner om produkta, å seie for deg?
  • Dersom det står mange negative kommentarar om eit produkt, ville du likevel kjøpt det, og i så fall kvifor?
  • Er nokre kommentarar meir truverdige enn andre? Kva er det i så fall som gjer dei meir truverdige?
  • Diskuter i klassa kva de finn, og kva som er truverdige tilbakemeldingar som de ville ha teke med dykk i dykkar eiga kjøpsavgjerd.





Relatert innhald

Fagstoff
Fasane i kundereisa

For å kunne kartleggje forbrukaråtferd må vi kjenne til og forstå kjøpsprosessen til forbrukarane – den såkalla kundereisa.