Hopp til innhald
Oppgåve

Kartlegging av kundereisa

I denne oppgåva skal de jobbe i par med kundereisa og kontaktpunkt. Når de er ferdige, kan de presentere og diskutere med dei andre para. De kan òg gi ei bedrift ei nyttig tilbakemelding. Bruk gjerne digitale verktøy de kjenner, til samskriving og deling. Eller prøv eit nytt verktøy!
Hender som skriv på Post-it lappar på eit vindauge. Foto.
Post-it. Bilete: NTB / Avgrensa bruksrett

Førebuing

  • Bruk eit digitalt verktøy de er kjende med frå før, der de kan samskrive, laga tankekart og dele. De kan prøve Webjets, som de finn meir informasjon om i boksen under. Eit anna alternativt er å lage eit tankekart i PowerPoint, sjå døme nedst på sida. De kan bruke bilete og/eller videoar i tillegg til tekst.
  • Spør læraren om de kan få Post-it-lappar.
  • Les artikkelen om kontaktpunkt og kundereisa (lenkje nedst på sida).
  • Vel ei vare eller ei teneste de akkurat har kjøpt, eller noko de ønskjer å kjøpe, til dømes ein ny moped eller skuter?
Lyst til å prøve verktøyet Weje?
  • Weje er eit digitalt verktøy der du mellom anna kan samskrive og dele.
  • Med Wejes kan de lage digitale tankekart med artige funksjonar.
  • På nettsida til Weje kan du registrere deg.
  • Bruk av Weje krev registrering med e-post-adresse. Når du skriv inn e-post-adressa, godkjenner du at ho blir lagd til i ei e-post-liste som mottek reklame. Du kan melde deg av att ved å klikke på lenkja i botnen av alle e-postane dei sender ut. Du kan òg slette brukaren din.
  • Lykke til!

Gjennomføring av oppgåve 1

  • Jobb i par.
  • Klassediskusjon: Likskapar og forskjellar mellom tankekarta.

Oppgåve 1

Lag eit visuelt tankekart som illustrerer kundereisa ved kjøp av vald vare eller teneste. Tankekartet blir delt inn i tre fasar der de tek med til dei ulike fasane i (sjå bilete med døme nedst på sida).

Her er nokre tips for å kome igang:

  • Fase 1 – Korleis oppstår behovet, kva eller kven påverkar dykk? Er det bloggar? Influensarar? Vener? Sosiale og kulturelle tilhøve? Annonsar? Sosiale medium?
  • Fase 2 – Søkje informasjon og vurdere alternativ. Kvar og korleis søkar de informasjon om produktet? Korleis brukar de informasjonen de finn?
  • Fase 3 – Kjøpsavgjerd og erfaringsdeling. Kva er avgjerande for at de kjøper akkurat dette produktet? Kvar deler de erfaringar om produktet de har kjøpt?

Når de har laga tankekartet dykkar ferdig, kan de presentere resultatet for kvarandre i klassen. Er kundereisene like? Kva er annleis? Er det noko som overraskar dykk?

Gjennomføring av oppgåve 2

  • Jobb i par.
  • Bruk Post-it-lappar på veggane i klasserommet.

Oppgåve 2

I denne oppgåva skal de ta utgangspunkt i kundereisa frå førre oppgåve og sjå nærare på kontaktpunkta i fase 2.

  • Skriv dei ulike kontaktpunkta på kvar sin Post-it-lapp, og fest dei etter kvarandre på veggen.
  • Beskriv innhaldet i dei ulike kontaktpunkta på nye Post-it-lappar, som de så festar under det aktuelle kontaktpunktet.
  • Ser de forbetringsmoglegheiter i nokre av kontaktpunkta?
  • Vel ut eitt kontaktpunkt de meiner bedrifta kan forbetre seg i.
  • Beskriv forbetringane de meiner bedrifta bør gjere, på ein Post-it-lapp som blir festa på veggen.

Kanskje kan de gi nokre råd til bedrifta om korleis dei kan forbetre seg i det kontaktpunktet de har sett på? Skriv ei hyggeleg tilbakemelding til bedrifta med forslaget dykkar.

Biletet under viser eit døme på byrjinga av eit tankekart for kundereisa til ein moped. Det er laga i PowerPoint. De kan leggje inn så mange "tankar" de ønskjer. Bruk gjerne bilete og/eller videoar. Det kan bli ganske mange kontaktpunkt!

Tankekart for kundereisa til ein moped. Fase 1, 2 og 3 er satt inn med kontaktpunkt til kvar fase. Illustrasjon.
Døme på tankekart i PowerPoint. Bilete: Cathrine Meyer Johansen / CC BY-NC-SA 4.0

Relatert innhald

Fagstoff
Kontaktpunkt på kundereisa

For å kunne kartleggje kjøpsåtferd må ein kjenne til kundereisa og alle kontaktpunkta til kunden. Då kan ein treffe med marknadsføringa.