Hopp til innhald
Oppgåve

Yrkesetiske val

Kvar dag vil du som barne- og ungdomsarbeidar spontant handtere små og store situasjonar i møte med barn, unge, foreldre og kollegaer. Du tek val på vegner av barn og unge, og du nyttar det profesjonelle skjønnet ditt til å handle i ein faktisk situasjon.
Vi ser barn som står oppstilte på første skoledag med vaksne bak seg. Vi ser ikkje hovuda til personane. Foto.
Barn som står oppstilte på første skuledag. Korleis er det når dei føresette ikkje får vere med inn i klasserommet? Bilete: Stian Lysberg Solum / CC BY-NC-SA 4.0

Du må vere både medvite og reflektert i rolla di som barne- og ungdomsarbeidar. Dei etiske vala du tek, kjem an på situasjonen du er i, og etiske retningslinjer er eit nyttig verktøy for å sikre det beste for barnet.

Under utbrotet av covid-19 i 2020 vart barnehagar, skular og SFO bedne om å gjere diverse tiltak for å hindre smittespreiing. Mellom anna vart det innført reglar om at føresette ikkje fekk kome inn og levere eller hente barna sine i dei ulike institusjonane. Dette hadde mellom anna stor betyding for førsteklassingane ved skulestart hausten 2020. Føresette fekk ikkje lov til å vere med inn i klasserommet, men måtte vente utanfor skulen.

Oppgåver

  1. Du jobbar som barne- og ungdomsarbeidar på skulen. På første skuledag er det eit av barna som ikkje vil gå frå dei føresette når dei skal inn i klasserommet. Føresette har fått beskjed om at dei dessverre ikkje kan bli med inn.
    1. Kva kan du som barne- og ungdomsarbeidar gjere?
    2. Korleis vil du gjere det?
    3. Kvifor vil du gjere det slik?
    4. Kva konsekvensar kan handlingane dine få? Diskuter gjerne i grupper.

  2. Du jobbar som barne- og ungdomsarbeidar i ein barnehage. Då barnehagen vart gjenopna våren 2020, vart barna fordelte i kohortar. Det betydde at barn og vaksne vart delte i faste, mindre grupper som berre skulle vere saman med kvarandre for å hindre covid-smitte. Desse gruppene vart av mellom anna Utdanningsdirektoratet kalla kohortar. Søskenpar og nære vener vart plasserte i same kohort så langt det gjekk. I barnehagen din blir eit søskenpar plassert i ein kohort der eit av barna ikkje trivst og føler seg einsam.

    1. Kva kan du som barne- og ungdomsarbeidar gjere?
    2. Korleis vil du gjere det?
    3. Kvifor vil du gjere det slik?
    4. Kva konsekvensar kan handlingane dine få? Diskuter gjerne i grupper.

Relatert innhald