Demokrati og medverknad

Både rammeplanen for barnehagen og overordna del av læreplanen seier at barn i barnehage og skule/SFO skal få moglegheit til å medverke og erfare i fellesskap. På den måten kan dei utvikle forståing av kva demokrati er. Gjennom aktiv deltaking i fellesskapen får barna moglegheit til å forstå samfunnet og den verda dei er ein del av, betre.

Barnehagen og skulen/SFO skal fremme demokrati og vere ein inkluderande fellesskap der alle får høve til å ytre seg, bli høyrt og delta. Alle barn skal få oppleve demokratisk deltaking ved å bidra til innhaldet i barnehagen og skulen/SFO, uavhengig av dei språklege evnene sine. Samiske barn skal få moglegheit til å medverke på sitt eige språk.

Ulike meiningar og perspektiv skal få komme til uttrykk og vere utgangspunkt for utviklinga av barnehagen og skulen/SFO som demokratisk fellesskap. Som barne- og ungdomsarbeidar må du jobbe for å skape respekt for at menneske er ulike og har ulike meiningar.

Dialogen mellom vaksne og barn og mellom barnehage/skule/SFO og heimen må vere basert på gjensidig respekt. Barna skal erfare at dei blir lytta til, at dei har ein reell innverknad, og at dei kan påverke det som gjeld dei. Når stemma til barna blir høyrd, opplever dei både at dei kan ta eigne val, og at dei blir respekterte. Det er ei erfaring som har verdi her og no, og som bidreg til å førebu barna på å bli ansvarlege samfunnsborgarar.