Solbær

Dyrking og lagring

Den norske sesongen for solbær er kort og varer berre frå juli til august. Viss bæra blir oppbevarte kjølig, mellom 2 og 4 gradar, held dei seg i 2 til 4 dagar.

Bruksområde

Berre ein liten del av det som blir dyrka av solbær i dag, blir omsett i frisk tilstand, sidan mykje går til safting og sylting i næringsmiddelindustrien.

Solbær kan etast naturelle til dessert med sukker, til is eller med mjølk. Dei kan brukast til syltetøy, saft og gelé. Solbær er òg godt i pai saman med andre bær. Solbær er fine å lage vin og likør av og kan òg frysast.

Kvalitetskrav

Solbær skal vere velutvikla og mørke i fargen. Dei skal vere tørre og reine. Solbær skal ikkje ha trykkskadar eller flekkar.

Næringsinnhald

Solbær inneheld mykje antioksidantar, mellom anna vitamin C, flavonoid og antocyaninar i tillegg til nokre mineral.

Sjå Matvaretabellen frå Mattilsynet for nærare opplysningar om næringsinnhaldet.

Film om solbærdyrking

I filmen under (lengde 2:59) får du eit innblikk i solbærdyrkinga på Mølstad gard i Innlandet. Du lærer meir om helseeffekten av bæra og korleis dei kan lagast til på freistande, sunne måtar året rundt.