Øv deg på å skrive e-post på jobben

Før du gjer oppgåvene

Før du jobbar med oppgåvene under, bør du ha lese fagartikkelen "Skriv ein profesjonell e-post".

Del 1: Les ein modelltekst

Jobb saman to og to.

Sjå på modellteksten nedst i oppgåva. Han viser korleis ein e-post som er send til ein kunde, kan sjå ut. Les han høgt for kvarandre før de svarer på spørsmåla under:

1. Kva skal stå i til-feltet i e-posten?

2. Kva skal stå i frå-feltet i e-posten?

3. Kva skal eventuelt stå i kopifeltet?

4. Kva skal stå i emnefeltet?

5. Gi døme på høfleg og formelt språk i e-posten.

6. Gi døme på ulike måtar de kan avslutte ein e-post på, med ei hyggeleg helsing.

7. For å skrive inn ei e-postadresse må de ha med spesialteiknet @. Det rette namnet på dette teiknet på norsk er krøllalfa, men mange seier òg "alfakrøll".

   • Forklar og vis kvarandre korleis de får fram teiknet krøllalfa på ei datamaskin.

8. Det er ganske vanleg å bruke emojiar, som til dømes smilefjes, når vi skriv private tekstar. Men kvifor bør vi vere varsame med emojiar i profesjonelle e-postar? Diskuter.

9. Samanfatt i fellesskap i klassen: Kva er viktig å hugse på når de skal skrive e-postar på jobb?

• Modelltekst e-post(DOCX)

Del 2: Skriv profesjonelle e-postar til kvarandre

Jobb saman to og to. Skriv profesjonelle e-postar til kvarandre.

• Den eine er kunde/brukar, den andre ein tilsett som jobbar i eit firma.

• E-posten skal handle om eit fagområde de har på skulen.

Pass på at språket er tilpassa målgruppa, og at de har eit formelt språk.

De kan bruke malen under til å skrive e-postane inn i.

• Mal e-post(DOCX)