Slik skriv du cv

Før du les

Desse omgrepa bør du sjå nærare på før du les vidare:

Cv

Ein cv er ei ryddig oversikt med informasjon om ein persons arbeidserfaring og utdanning.

Søknad

Ein søknad er eit dokument der du søker på noko. Det finst mange ulike typar søknader. Til dømes søknad om lån eller jobbsøknad.

Arbeidstakar

Ein arbeidstakar er ein person som jobbar for nokon.

Arbeidsgivar

Ein arbeidsgivar er den du som arbeidstakar jobbar for.

Referanse

Ein referanse er ein person som kan seie noko om deg som arbeidstakar eller person. Det kan til dømes vere ein arbeidsgivar eller ein lærar.

Attest

Ein attest er ei skriftleg stadfesting. Ein jobbattest er eit skriftleg dokument som stadfester at du har jobberfaring.

Kva er ein cv?

Ein cv er eit dokument som du sender saman med ein jobbsøknad. Vi kallar det eit vedlegg. Cv-en din skal gi arbeidsgivar ei kortfatta oversikt over kven du er, kva du kan, og kva du har gjort så langt i livet. Bokstavane cv er ei forkorting for curriculum vitae. Ordet blir uttalt "kurikˊkulum vitæ" og er det latinske ordet for livsløp".

Arbeidsgivar får kanskje inn mange søknader og kan ikkje bruke mange minutta på kvar enkelt cv. Derfor bør du lage ein ryddig cv som er lett å lese og gir eit positivt inntrykk av deg.

• Cv dømetekst(DOCX)
• Cv dømetekst(PDF)

Du kan godt bruke ein ferdig mal når du skal lage din eigen cv. Då får han ein profesjonell layout. Men du kan òg setje opp ein enkel cv sjølv.

Overskrift

Det er ganske vanleg å ha "Curriculum vitae" som overskrift på cv-en sin. Overskrifta set du øvst på sida.

Personopplysningar

Først i cv-en fører du opp faktaopplysningar om deg sjølv. Desse opplysningane må alltid vere med:

• namn
• adresse
• telefonnummer

• e-postadresse

• fødselsdato

Utdanning

Deretter fortel du kort kva du har av utdanning. Ta med:

• namn på fag eller utdanningsprogram
• namn på skulen og namn på staden skulen ligg på
• året då du tok eksamen

Bruk omvend kronologisk rekkefølge. Det vil seie: Utdanninga som er nyast, skal stå øvst, og så går du bakover i tid.

Arbeidserfaring

Du må fortelje kva slags arbeid du har hatt så langt. Når du er nokså fersk i arbeidslivet, bør du føre opp alle typar jobbar du har hatt, òg ferie- og helgejobbar, og arbeidspraksis i regi av skulen. Pass derfor alltid på å få attest frå slike jobbar.

Begynn igjen med det nyaste arbeidsforholdet. Ta alltid med

• namn på arbeidsgivar
• kva slags stilling du har hatt
• når og kor lenge du har hatt jobben

I nokre cv-malar kan du bli beden om å skrive kort kva slags kompetanse stillinga har gitt deg. Det kan til dømes stå "skifting av bremser" eller "loggskriving". Det hjelper den som skal tilsetje deg, å sjå om du kan noko dei har bruk for.

Kurs og sertifikat

Viss du har gjennomført kurs som gjer deg betre kvalifisert til jobben, nemner du dei som eit eige punkt. Det kan til dømes vere førarkort, truckførarbevis eller førstehjelpskurs. Då må du skrive opp

• året då du tok kurset eller førarkortet

• kva slags kurs eller sertifikat du har teke

Andre opplysningar

Vurder kva meir som er verd å nemne − til dømes tillitsverv, fritidsinteresser, lengre utanlandsopphald og språkkunnskapar. Du kan samle alle desse opplysningane under overskrifta "Andre opplysningar".

Referansar

Referansar er eit anna viktig punkt du må ha med. Ein referanseperson er nokon som kjenner deg og kan seie noko positivt om deg som arbeidstakar eller person. Det kan til dømes vere ein arbeidsgivar eller ein lærar. Men den du spør, skal ikkje vere i nær familie med deg.

Du må oppgi referansepersonens

• namn
• stilling
• arbeidsstad
• telefonnummer

Du må spørje referansepersonar før du fører dei opp i cv-en eller søknaden din. Det er vanleg å oppdatere med nye referansar etter kvart som du blir eldre. Det er fordi referansar skal seie noko om korleis du er som arbeidstakar eller person no, og ikkje lang tid tilbake. Det er ganske vanleg å ha opptil tre referansar i cv-en sin.