Kodekammer – marknadsstrategi for Trøll

Det er utarbeidd ei lærarrettleiing til kodekammeret som gir deg som lærar sjølve kodane og tips til gjennomføring av kodekammeret.

Ønsker du å få tilsendt lærarrettleiing? Skriv til oss på hjelp@ndla.no.

Forslag til korleis kodekammeret kan setjast i kontekst i undervisninga og brukast som vurdering, finn du i ressursen "Kodekammer".

Les nøye gjennom instruksane nedanfor før du tek fatt på arbeidet i prosjektgruppa i rolla som nytilsette Kim. I kodekammeret skal du følge heile prosessen med å utvikle ein marknadsstrategi. Store delar av handlinga går føre seg i eit møterom der prosjektgruppa har møte.

Tidsbruk

Minimum 2 skuletimar

Førebuingar

Finn fram

• pc

• øyrepluggar

• papir og penn

Organisering

Kodekammeret har eit variert innhald med mellom anna korte filmar, fagtekstar, bilete og interaktive oppgåver.

Alle visuelle og auditive element som har noko å seie for oppgåva, har eit tekstalternativ. Scenebeskrivinga i kvar scene inneheld viktig informasjon for dei som bruker skjermlesar.

Det er lagt til bakgrunnslydar i oppgåva, som bidreg til opplevinga av å vere i ulike situasjonar. Ikonet der du kan slå av og på desse lydane, er eit lite høgtalarikon nedst i venstre hjørne (for skjermlesar: "Play Audio Track").

Navigering

• Gå inn på dei ulike plussikona i den talrekkefølga som er oppgitt på desse klikkpunkta. Hugs å gå inn på alle plussikon og informasjonsikon.

• Når du skal ut av eit klikkpunkt, må du bruke tilbake-knappen (ikkje Esc-knappen, for den tek deg ut av fullskjermmodus).

Kodar

For å komme vidare til neste scene i kodekammeret må du skrive inn ein kode, anten eit tal eller eit relevant fagomgrep. Set deg inn i all tilgjengeleg informasjon i rommet du er i. På den måten vil du finne fram til rettesnorer, i form av tal eller bokstavar, som fører deg til rett kode. Skriv ned rettesnorene undervegs.