Temu

Nettbutikken Temu har teke verda med storm, med til tider ekstremt låge prisar og løfte om fri frakt. Temu er no ein av dei mest nedlasta appane i Noreg. Drøft ulike etiske problemstillingar knytte til nettbutikken Temu.

Oppgåve

I denne oppgåva skal de drøfte i kva grad Temu bruker konkurransemidla på ein etisk måte.

Del 1: Produkt

Sjå filmklippet Temu, til hvilken pris? (lengde 3:49) nedanfor og diskuter etiske utfordringar ved Temu sine produkt.
- Forklar samanhengen mellom berekraft og etikk.
- Kva for berekraftsutfordringar er knytte til Temu sine produkt?
- Kva for andre etiske utfordringar er knytte til produkta til Temu?
- Kva for tiltak kan Temu implementere for å sikre meir etiske og berekraftige produkt?

Del 2: Pris

KI-beskriving av Temu sin prisstrategi

Temu er ein kinesisk nettbasert marknadsplass som har oppnådd rask vekst ved å tilby eit breitt spekter av produkt til svært låge prisar. Prisstrategien deira er basert på fleire nøkkelfaktorar:

Direkte sal frå produsent til forbrukar: Temu eliminerer mellomledd ved å la kinesiske leverandørar selje direkte til kundar. Dette reduserer kostnader knytte til distribusjon og forhandlarledd, noko som gjer det mogleg å tilby produkt til lågare prisar enn tradisjonelle butikkar. Kjelde: en.wikipedia.org
Stordriftsfordelar: Som ein del av Pinduoduo-gruppa, ei av Kinas største e-handelsplattformer, dreg Temu nytte av etablerte leverandørnettverk og logistikkstrukturar. Dette bidreg til å halde kostnadene nede og prisane konkurransedyktige. Kjelde: en.wikipedia.org
Aggressiv marknadsføring og gamification: Temu bruker omfattande marknadsføringskampanjar og interaktive element i appen for å engasjere brukarar og oppmuntre til hyppige kjøp. Dette inkluderer tidsavgrensa tilbod, spel og påskjønningssystem som skaper ei kjensle av hastverk og eksklusivitet. Kjelde: nhh.no
Utnytting av tollfritak: Tidlegare har Temu drege nytte av tollfritak for små sendingar, kjent som "de minimis"-unntaket, som tillét import av varer under ein viss verdi utan å betale toll. Dette har bidrege til å halde prisane låge i marknader som USA. Kjelde: invezz.com

Denne prisstrategien har gjort Temu attraktiv for prisbevisste forbrukarar, men har òg ført til bekymringar knytte til produktkvalitet, miljøpåverknad og konkurransevilkår for lokale forhandlarar. Kjelde: tv2.no

ChatGPT si oppsummering (10.02.25)

Drøft

Drøft om de kan stole på informasjon frå ulike KI-verktøy.
Les om Temu sin prisstrategi ovanfor og sjekk ut om det som står der, stemmer. Ta gjerne utgangspunkt i kjeldene som er oppgitte.
Drøft korleis Temu sin prisstrategi kan påverke andre aktørar i bransjen.
Drøft om Temu har ein etisk prisstrategi.

Del 3: Distribusjon

Finn informasjon om distribusjonsstrategien til Temu.
Drøft korleis Temu sin distribusjonsstrategi påverkar berekraft og miljø.
I kva grad synest de at Temu bruker konkurransemiddelet distribusjon på ein etisk måte?
Diskuter og kom med forslag til korleis distribusjonen til Temu kan bli meir etisk.

Del 4: Marknadskommunikasjon

Les først kva Reklameskolen skriv om manipulerande design:

Manipulerande design er utforming og ord som er meint å påverke deg til å gjere noko du eigentleg ikkje vil. Det kan vere å handle, bli verande som kunde eller få deg til å gi frå deg personopplysningar. Eit typisk døme er eit timeglas som er i ferd med å renne ut når du ser på ei vare, og som gir deg kjensla av å måtte skunde deg å handle for å få ein god pris. Andre døme kan vere prangande fargar, strategisk plassering av svært gode tilbod, at du må gjennomføre fleire trinn for å seie opp eit abonnement, eller at opplysningar om angrerett eller kontaktinformasjon er vanskeleg å finne. (Reklameskolen, u.å.)

Beskriv og diskuter

I interaktiviteten under er det to bilete, eitt med og eitt utan manipulerande verkemiddel. Flytt markøren mot høgre eller venstre for å avdekke bileta.
- Beskriv dei ulike elementa i det manipulerande designet, og forklar korleis dei blir brukte for å påverke forbrukarar.
- Diskuter etiske utfordringar knytte til bruk av manipulerande design.
- Foreslå alternative designløysingar som kan vere meir etiske, men framleis effektive.

Diskuter i kva grad de synest Temu har ein etisk marknadskommunikasjon.

Kjelde

Reklameskolen. (u.å.). Se opp for manipulerende design. Henta 13. mars 2025 frå https://www.reklameskolen.no/vgs/oppgaver/pass-deg-for-fellene/

Marknadsstrategi