Dykk i djupet på temaet kvinnekamp

Å fordjupe seg betyr ifølgje ordboka "å gå til botnar" og "samle tankane sine". Når du dykkar i djupet på eit emne, vil du sannsynlegvis både få meir kunnskap og forstå meir. Denne oppgåva legg vekt på det norskfaglege, men i djupnelæring kan det vere lurt å trekkje inn kunnskap frå fleire fag for å forstå temaet godt. Når du skal fordjupe deg i temaet kvinnekamp, passar nok særleg samfunnsfaglege og historiske emne inn.

Djupnelæring inneber at du

• skal avdekkje kva du kan om eit tema

• skal byggje opp ny kunnskap gradvis. Bruk gjerne mange ulike teksttypar: dokumentarfilmar, fiksjonsfilmar, saktekster og skjønnlitteratur

• ser etter likskapar og forskjellar mellom tekstane

• byggjer kunnskap i samspel med både medelevar og læraren din: diskuter, vurder og lytt!

• analyserer og reflekterer over tekstane du bruker undervegs

• reflekterer over eiga læring undervegs og mot slutten av prosessen. Kan noko av det du har lært overførast på andre tema eller brukast i andre samanhengar?

Somme av tekstane vi tipsar deg om under, er utdrag frå bøker. Om du verkeleg vil gå i djupna, bør du lese ei heil bok. Somme av bøkene har vi lenkja til digital utgåve her. Dei andre kan du låne på biblioteket.

Eit godt tips i startfasen er å lage ei problemstilling du ønskjer å finne svar på. Skriv gjerne ned nokre spørsmål du lurer på heilt i starten. Etter kvart kan du forme desse spørsmåla til ei problemstilling. Ikkje ver redd for å endre formuleringa i problemstillinga undervegs. Hugs at problemstillingar er dynamiske!

Tema: Kvinner som gjer opprør

Med opplysingstida si vekt på fridommen til individet voks det òg ei kvinnerørsle fram frå midten av 1800-talet. Dei arbeidde for at kvinner skulle få like rettar som menn. Forfattarar i tida skreiv om viktige saker som undervisning, ekteskap, arbeidsliv, sedskap og røysterett.

Dagens forfattarar behandlar nokre av dei same temaa, for sjølv om likestillinga har komme langt i Noreg, er det område i samfunnet der menn dominerer, og kvinner blir haldne nede.

• Kva forventningar stiller dagens samfunn til kvinner, ifølgje ulike tekstar?

• Kva er dei viktigaste forskjellane mellom kvinnerolla på 1800-talet og den moderne kvinnerolla?

• Korleis framstiller ulike tekstar karakterar som kjempar mot samfunnsnormene?

I norskfaget er det forventa at du trekkjer inn døme frå tekstar du har lese når du skal presentere emnet du har fordjupa deg i. Her kjem forslag til korleis du kan leggje fram funna dine:

• Skriv ein fagartikkel der du reflekterer over ulike perspektiv på kvinnekamp.

• Lag ein podkast. Gå saman i grupper på tre eller fire og diskuter dei ulike perspektiva på kvinnekamp som kjem fram i tekstane.

• Hald eit foredrag om ulike perspektiv på kvinnekamp i tekstar.

• Foredrag med rollespel: Gå saman i grupper. Hald eit foredrag, men veksle mellom klassisk foredrag og rollespel. Bruk scener frå tekstane de har lese for å illustrere poenga de vil ha fram.

• Arranger ein klassediskusjon. Alle i klassen les tekstar. Vel ut to medelevar som skal leie diskusjonen.