Fagterminologi er fagspråket vårt. Presis ordbruk gjer at vi kan ha ei felles forståing av arbeidet. Vi skal sjå nærare på korleis vi beskriv ulike linjer i frisørfaget.
Formlinje
Viss du trekkjer håret ut 90° frå hovudforma, er formlinja den ytste linja som blir danna av spissane til håret.
Formlinja kan klippast teknisk, det vil seie rett av, eller taggete. Ei ujamn formlinje er anten effilert, pointet eller slicet. Formlinja skal teiknast inn på arbeidsteikninga.
Guide eller guidelinje
Ein guide er ei klippelinje som er rettleiar for resten av klippen.
Designlinje
Designlinje er den avsluttande linja som hårspissane dannar rundt heile frisyren, eller ei brytning i klippen.
Designlinja kan vere ulik på ulike personar og ulike frisyrar. Ho kan vere horisontal, diagonal, konveks eller konkav. Det vil seie at linja kan vere vassrett, på skrå eller svinge ut- eller innover.
Diagonal
Diagonal framover er når håret er kortast bak og lengst framme, mens diagonal bakover er når håret er kort framme og lengst bak.
Diagonal høgre skrår mot høgre hand, og diagonal venstre skrår mot venstre hand.
Ytre designlinje
Ytre designlinje er ei avslutning på ei klippeform, den nedste linja av front, side og nakke.
Indre designlinjer
Indre designlinje er ei brytning i klippen. Dette kallast òg ein step.