Vel kommunikasjonstiltak og -kanalar

Kommunikasjonstiltak er konkrete tiltak for å nå kommunikasjonsmål. Reklame, innlegg i sosiale medium og sponsing er døme på kommunikasjonstiltak.

Ved val av kommunikasjonstiltak er det viktig å tenke nytte i forhold til kostnader. Vil innsatsen vi legg ned i kroner i marknadskommunikasjonen gi nok effekt til at vi kan forsvare pengebruken?

Reklame og reklamekampanje

Reklame, som tv-reklame, radioreklame, annonsering på nett eller i aviser, er eit av dei vanlegaste kommunikasjonstiltaka i marknadskommunikasjon. I reklamar presenterer vi eigenskapane av produktet og appellerer gjerne til kjenslene hos mottakar.

Produktplassering

Produktplassering er eit kommunikasjonstiltak der eit produkt er sett naturleg inn i til dømes ein tv-serie, ein film, eller eit dataspel. Målet er at forbrukarar skal bli påverka ubevisst. For å verne forbrukaren er det likevel eit lovkrav at produktplassering skal merkast.

Eit døme på produktplassering for ZERoh! kunne til dømes vore at deltakarar i ein reality-serie hadde drukke ZERoh!.

Samarbeid med influensar

Ein influensar er ein person som publiserer og ytrar seg offentleg i sosiale medium for å påverke følgarane sine. Ein tømrar som legg ut eit situasjonsbilete på Instagram frå arbeidsdagen sin med ein tag til eit verktøymerke, er ein influensar på linje med ein kjendis som bruker og presenterer eit produkt i film på YouTube. Ein influensar kan få betalt eller bli sponsa med utstyr mot å jamleg legge ut bilete med produktet eller tagge innlegget.

ZERoh! samarbeider med influensarar som eit av kommuniksjonstiltaka sine. For å vere sikker på at bileta passar inn i den heilskaplege kommunikasjonsstrategien for ZERoh!, må influensarane få bileta godkjende før dei kan publisere dei på dei sosiale mediekanalane sine.

Kva er viktig å tenke på når vi skal velje kommunikasjonskanalar for eit kommunikasjonstiltak?

Medievanar

Når vi skal velje kommunikasjonskanal, må vi sjå på medievanane til kommunikasjonsmålgruppa. Vi må undersøke når kommunikasjonsmålgruppa bruker kva kommunikasjonskanalar, og til kva formål.

Vi set oss inn i medievanane til ei kommunikasjonsmålgruppe ved bruk av statistikkar. Mediebarometeret frå statistisk sentralbyrå (SSB) eller offentleggjorde undersøkingar frå medieanalysebyrå som Kantar kan gi god oversikt over medievanane til ulike kommunikasjonsmålgrupper. Vi kan òg overvake eigne sosiale mediekanalar, eller lage eller bestille eigne undersøkingar mot kommunikasjonsmålgruppa.

Tilgang til kommunikasjonskanalar

Det finst mange ulike kommunikasjonskanalar. Nokre er eigde av verksemda sjølv. Andre er betalingskanalar. Det finst òg gratiskanalar, som omtale i aviser og tidsskrifter. Vi kan skilje mellom kjøpte, eigde og fortente kanalar.

Kjøpte kanalar

Ved kjøpte kanalar, som til dømes tv-reklame, radioreklame, annonsering på nett eller i aviser, betaler verksemda for at bodskapen skal visast til kommunikasjonsmålgruppa.

Eigde kanalar

Nokre kommunikasjonskanalar eig verksemda sjølv. Slike eigde kanalar kan til dømes vere verksemda sine eigne nettsider og profilar på sosiale medium. I eigde kanalar kan ei verksemd fritt dele innhald som dei meiner er relevant for målgruppa.

Fortente kanalar

Det andre skriv om verksemda, til dømes ein avisartikkel i samband med at verksemda har lansert ein ny produktkategori, er fortente kanalar. Ein forbrukar som sjølv vel å poste bilete av produktet, dele innlegget for verksemda og vidareformidlar bodskapen for verksemda, er eit anna døme på fortent merksemd.

Bodskap formidla i fortente kanalar har høgt truverd og er gratis. Utfordringa er at det ikkje er mogleg å planlegge. Verksemda kan heller ikkje kontrollere bodskapen, og effekten i etterkant er vanskeleg å måle.

Eigenskapane til kommunikasjonskanalar

Når vi skal velje kommunikasjonskanal, må vi vurdere evna kanalen har til å overføre bodskapen vår til målgruppa. Vi ønsker å velje den kommunikasjonskanalen eller dei kommunikasjonskanalane som kan formidle bodskapen på ein god og effektiv måte til kommunikasjonsmålgruppa eller kommunikasjonsgruppene.

Eigenskapane til kommunikasjonskanalar deler vi inn i:

• presentasjonseigenskapar

• distribusjonseigenskapar

• reaksjonseigenskapar

Presentasjonseigenskapar vil seie evna kommunikasjonskanalen har til å presentere bodskapen. Positive presentasjonseigenskapar for kommunikasjonskanalar kan til dømes vere mogelegheit for levande bilete, lyd og god teknisk kvalitet. Negative presentasjonseigenskapar kan vere avgrensa mogelegheit for bruk av estetiske verkemiddel og tilpassing.

Med distribusjonseigenskapar meiner vi evna kommunikasjonskanalen har til å nå kommunikasjonsmålgruppa. Det er viktig å kjenne til dekningsdataa til kommunikasjonskanalen, altså talet på dei som får bodskapen. Det er òg viktig å kjenne til strukturdataa til kanalen, det vil seie kven som får bodskapen. Når det gjeld distribusjonseigenskapar, er det altså ein fordel å kunne målrette bodskap til spesifikke kommunikasjonsmålgrupper. På den andre sida er det ei ulempe dersom det er vanskeleg å ha kontroll på kven som er mottakarar.

Reaksjonseigenskapar er evna kommunikasjonskanalen har til å framkalle reaksjonar. Kva for reaksjonar er det vi vil oppnå med marknadskommunikasjonen? Det er positivt når ein kommunikasjonskanal bidreg til at vi som sendarar av ein bodskap har merksemda til mottakarar, som til dømes ved kinoreklame. Vidare er det positivt dersom det er mogleg å reagere direkte på bodskapen. Det er negativt dersom eksponering i kommunikasjonskanalar ikkje gir merksemd, om det gir negativ merksemd og/eller at forandra åtferd er vanskeleg å få til.