Samtidig må òg ei bedrift som har ei sterk merkevare, som Nike, halde ved like kjennskapen ved å vere jamt synleg for kundane sine. Viss dei ikkje er det, kan ein konkurrent som er meir synleg, bli den kunden vel å kjøpe frå.
Auka kjennskap, auka sal over tid
Marknadsaktivitetar som skal auke kjennskapen til ei bedrift eller eit produkt, har ikkje til føremål å påverke til salsauke på kort sikt. Aktivitetane skal hjelpe bedrifta med å auke salet over tid gjennom at folk kjenner til bedrifta eller produktet.
Eit døme på ein marknadsaktivitet som aukar eller held ved like kjennskapen, er ein annonsekampanje for Coca-Cola i sosiale medium. Annonsen viser berre ein iskald Cola-boks som blir opna. Teksten seier «helgekos». Eit anna døme er «programmet er sponsa av» i byrjinga eller slutten av ein populær TV-serie, der bedrifter får vist logoen sin. Dette er særleg vanleg når produkta bedrifta sel, er relevante for TV-serien.
Merkevare – meir enn berre kjennskap
Når vi snakkar om å auke kjennskap, snakkar vi òg ofte om å byggje merkevara. Det er likevel ein forskjell på kjennskapssauking og merkevarebygging. Verdien til ei merkevare handlar om meir enn at dei som er i målgruppa, kjenner til produktet. Ei merkevare gir folk nokre assosiasjonar eller oppfatningar av eit produkt, eller ei bedrift, utover at dei kan skilje produktet frå ein konkurrent.
Tenk etter
Er det nokon merke eller produkt du sjølv føretrekkjer fordi du meiner dei er betre enn konkurrentane?
Desse assosiasjonane, eller oppfatningane, gjer at vi som forbrukarar ofte føretrekkjer eit produkt framfor ein konkurrent. Som marknadsførarar ønskjer vi at målgruppa vår skal ha ei oppfatning av produktet vårt som gjer det meir attraktivt.
For å byggje merkevara er det viktig å vere konsekvent med kva assosiasjonar vi skaper, i alle marknadsaktivitetane vi planlegg.
Døme på merkevarebygging
Mange tenkjer «matvarer med låge prisar» når dei høyrer «Rema 1000». Rema 1000 har brukt mange år og mykje ressursar på å byggje opp assosiasjonen «låge prisar» som ein del av merkevara si. Låge prisar er så viktig for Rema 1000 at dei òg kommuniserer dette i søkjeannonsane sine på Google.
Ved å gjenta bodskapen slik Rema 1000 gjer, har dei greidd å skape ei oppfatning i den norske befolkninga om at vi får billeg mat på Rema 1000.
Vi må skilje oss ut frå konkurrentane
I ei verd med stor konkurranse og der mange slåst om merksemda til forbrukarane, er det viktig for ei bedrift å skilje seg ut. Vi som marknadsførarar vil derfor at kundane våre assosierer merkevara vår med noko positivt, ein opplevd fordel. Dette ønskjer vi fordi vi vil at dei skal hugse og velje produktet vårt når behovet melder seg. Dette må vi byggje opp over tid med alle marknadsaktivitetane våre.