Slik lagar vi ein enkel marknadsplan
Det er ingen absolutte reglar for innhaldet i marknadsplanen. Oversikta under gir oss ein peikepinn om kva vi bør ha med:
Steg | Tema | Beskriving |
|---|---|---|
1 | Samandrag av rammene for marknadsplanen | Kva marknadsstrategi har bedrifta?
|
2 | Mål | Kva er målet til bedrifta? |
3 | Budsjett | Kor mykje pengar kan vi bruke? |
4 | Aktivitetar
| Kva aktivitetar vil vere dei beste for å støtte opp om målet til bedrifta? |
5 | Tidsplan | Når skal aktivitetane gjennomførast? |
6 | Ansvarleg | Kven er ansvarleg for at aktivitetane blir gjennomførte? |
I artikkelen "Kva er ein marknadsplan?" finn du fleire detaljar om kvart av punkta ein marknadsplan bør innehalde.
Døme frå reiselivsbransjen
Vi er ei reiselivsbedrift, AS Fjordcruise, som tilbyr sightseeing i norske fjordar. Bedrifta har ein båt som kan ta inntil 40 passasjerar. Vi tilbyr sightseeing i sommarmånadene, frå 1. mai til 30. august kvart år. Vi planlegg å køyre to turar per dag. Sommarsesongen er derfor veldig viktig for oss. Vi får besøk av både norske og utanlandske turistar.
Dei viktigaste kanalane våre for billettsal er nettstaden vår og gjennom reisearrangørar. Samanliknar vi tilbodet vårt med konkurrentane, ser vi at vi har høgare prisar. På den andre sida har vi meir komfortable båtar med gode sete og god utsikt til alle passasjerar. Vi tilbyr òg eit måltid med mat og drikke om bord.
No skal vi bruke punkta over for å lage marknadsplanen for det komande året.
Tema | Beskriving |
|---|---|
1 Rammene for marknadsplanen | Vi har høgare pris og betre kvalitet på produktet vårt. Vi tilbyr altså meir enn konkurrentane på turane våre. Dette er våre USP-ar – eller unike salspoeng. Dette er eit val leiinga i bedrifta har teke. Den viktigaste kanalen vår for sal er nettstaden vår. Situasjonen i dag er at ingen andre tilbyr det same som oss. |
2 Mål | Målet for komande sesong er at vi skal ha 6 000 passasjerar i perioden 01.05.–30.08. Via bestillingssystemet på nettstaden kan vi følge med på talet på nye bestillingar. |
3 Budsjett | Kvar billett kostar 750 kr. Med 6 000 gjester om bord bereknar vi inntektene til å bli 4 500 000 kr. For at dette skal løne seg (når vi trekker frå kostnadene til bensin, løn, mat og drikke med vidare), har vi berekna at vi kan bruke 500 000 til marknadsføring. |
4 Marknads-aktivitetane | Målgruppe: |
5 Tidsplan | Vi veit at utanlandske gjester planlegg ferien sin tidlegare enn nordmenn. I USA er det vanleg å planlegge i desember og januar. Nordmenn planlegg ferien seinare, gjerne frå april og utover. |
6 Ansvar | Det er dagleg leiar som er marknadsansvarleg i bedrifta, og den som følger opp at marknadsaktivitetane blir gjennomførte. |
I dømet over har vi avklart kva som er viktig for oss på kvart av punkta. No er vi klare til å beskrive dei ulike aktivitetane i marknadsplanen vår:
Biletet over viser ei oversikt over planlagde aktivitetar: kva kanalar vi skal satse på, kven som er målgruppa vår, budsjett fordelt på dei ulike aktivitetane, kva mål vi har for aktivitetane, kort om bodskap og kven som er ansvarleg. I tillegg viser vi når vi planlegg å gjennomføre aktivitetane.
I marknadsplandokumentet kan vi skrive litt meir om dei ulike punkta, til dømes kven som er i målgruppe 1, 2 og 3.
Når vi er ferdige med marknadsplanen og har fått han godkjend i bedrifta, kan vi setje i gang med å lage meir detaljerte planar for kvar marknadsaktivitet (kampanjeplanar).