Dei ulike fagområda
Sjølv om det er elleve ulike fag-/sveinebrev, er det òg store likskapar i i opplæringa innanfor desse faga.
Etter vg1 kan du velje mellom tre ulike programområde på vg2: kokk- og servitørfag, matproduksjon eller bakar og konditor.
Vg2 kokk- og servitørfag
Etter vg2 kokk- og servitørfag kan du ta læretid innanfor kokkfag, ernæringskokkfag, servitørfag eller ferskvarehandlarfag. Alle desse faga jobbar med mykje av dei same råvarene, men med ulikt utgangspunkt og kundebehandling. Mens servitørar og ferskvarehandlarar har direkte kontakt med kundane, vil kokkar og ernæringskokkar som oftast jobbe mest med tillaging av råvarene.
Vg2 matproduksjon
Etter vg2 matproduksjon kan du ta læretid innanfor slaktarfag, kjøttskjerarfag, pølsemakarfag, industriell matproduksjon eller sjømatproduksjon. Felles for desse faga er at ein jobbar i produksjonsbedrifter som produserer store mengder mat av råvarene.
Her er det ofte mykje maskinelt arbeid og bruk av høgteknologisk utstyr, men det blir òg brukt mykje manuelt arbeid, spesielt innanfor kjøttskjering og slakting. God kunnskap om riktig behandling og tilarbeiding av råvarer er viktig.
Vg2 bakar og konditor
Etter vg2 bakar og konditorfag kan du ta læretid innanfor bakarfag eller konditorfag. Det er store likskapar innan kva råvarer ein jobbar med, og dei samarbeider ofte for å fylle opp ein disk med fleire produkt eller med levering til butikk. Mens bakaren har størst fokus på produkt med gjær, vil konditoren ha mest fokus på søtsaker.
Merk!
Du kan ta læretid innanfor ferskvarehandlarfaget etter alle dei tre vg2-områda.
Fleire fag-/sveinebrev
Ønsker du å ta fleire fag-/næringsbrev, vil læretida i fag frå same vg2-område vere eit år. Det vil seie at viss du ønsker å ta fagbrev som servitør etter å ha teke fagbrev som kokk, treng du eit år med læretid før du kan avlegge ein ny fagprøve.
Fellestrekk innanfor fagområda
Sjølv om bedriftene er ulike og har ulike arbeidsoppgåver, så vil ein del tema vere felles.
Mellom anna vil alle fagområda ha fokus på berekraft og på å ta gode miljømedvitne og ansvarlege val for framtida. Det handlar om å ha ein berekraftig matproduksjon, utnytte råvarene best mogleg og redusere matsvinn og utslepp frå produksjonen.
Det blir jobba med mykje maskiner og utstyr som potensielt kan føre til skade, så arbeid med HMS vil vere ein del av arbeidskvardagen for alle fagarbeidarane innanfor restaurant- og matfag.
Eit sterkt fokus på kvalitet og trygg mat er òg noko som kjenneteiknar denne bransjen. Alle som jobbar innanfor restaurant- og matfag, har mykje kunnskap om og forståing av hygiene og kvalitetsstyringssystem i bransjen, i samsvar med gjeldande lover og forskrifter.