Etikk er lønnsamt
To bransjar kjem ofte i eit negativt søkjelys når det gjeld svinn og snusk: handels- og servicenæringa og handverkarar. Den første er kjend for svinn, den andre for snusk. Tapa blir store fordi begge bransjane er store.
Låg yrkesetisk standard valdar samfunnet kostnader for milliardar av kroner årleg.
Godt omdømme
Dei siste åra har det vore fleire døme på ulovleg og uetisk åtferd som har gitt bedriftene dårleg omtale. Dårleg omtale går ikkje berre ut over den aktuelle bedrifta, men kan råke ein heil bransje.
I forbrukarundersøkingar har folk blitt bedne om å rangere ulike bransjar etter lovmoral.
Spørsmålet var: I kva grad har du tillit til at bransjen etterlever dei lovene og reglane som skal verne deg som forbrukar?
Resultatet var slik:
Mykje negativ omtale i massemedia førte til at taxinæringa kom dårlegast ut. Trass i at den dårlege omtalen er knytt til enkeltpersonar og enkeltsaker, tenkjer mange at taxinæringa er useriøs og til dels kriminell. Slik har heile næringa fått eit dårleg omdømme.
Hovudregel
God etikk gir godt omdømme – dårleg etikk gir dårleg omdømme. Er vi i tvil om kva som er det rette, kan svaret på spørsmålet nedanfor vere ei praktisk rettesnor: Korleis vil denne handlinga ta seg ut som førstesidestoff i avisa i morgon?
Tenk over
Ein servicemedarbeidar representerer ikkje berre seg sjølv og bedrifta ho eller han er tilsett i, men ei heil næring (bransje). I mange næringar innanfor service og samferdsel er medarbeidarane synlege for folk flest. Når ein buss- eller drosjesjåfør køyrer aggressivt, bryt fartsgrensa eller behandlar passasjerane uhøfleg, er det lett for passasjerar og andre trafikantar å tenkje at slik er denne bransjen.