Kva vil det seie å yte service i samsvar med etiske retningslinjer?
I servicebransjen vil også dei etiske retningslinjene variere frå bedrift til bedrift, men mykje av verdigrunnlaget vil vere felles for mange fag og bedrifter. Når vi yter service, gjer vi det til kundar. God kundebehandling vil derfor vere ein vesentleg del av retningslinjene. I dei fleste etiske retningslinjene vil det derfor vere lagt vekt på dei grunnleggjande verdiane våre og menneskesynet vårt.
Ein skal behandle kundar med respekt og verdigheit uavhengig av om kunden er rik eller fattig, gammal eller ung. Avhengig av kva vi gjer, vil ein kunne etablere retningslinjer som skal vareta dette. I mange yrke har tilsette til dømes teieplikt om tilhøve ved kundar nettopp for å verne verdigheita til kunden.
Salsarbeid og etiske reglar
I mange serviceyrke er salsarbeid ein viktig del av arbeidet. Bedrifta kan då lage retningslinjer for å sikre at seljarane varetek både lovverket og andre verdiar.
Det er ei utmerkt etisk retningslinje at seljaren skal opptre på ein slik måte at kundane får god hjelp til å bestemme seg, ved at seljaren gir dei tilstrekkeleg vareinformasjon og nok rettleiing i kjøpsprosessen. Det motsette er retningslinjer for sal som berre handlar om å få kunden til å kjøpe så mykje som mogleg av dei produkta bedrifta tener best på.
Å selje ei dårleg løysing til kunden er det motsette av god salsetikk. Å vere etisk i salsarbeidet betyr faktisk at viss vi veit at konkurrenten har eit betre tilbod eller noko som passar kunden betre, så må vi sende kunden dit.
Å feilinformere om eigne produkt for å få kunden til å kjøpe dei, er svært dårleg etikk. Ei slik åtferd vil derfor vere brot på dei etiske retningslinjene i ei bedrift med sunne verdiar.
Tenk over
Du er butikkseljar og får inn ein kunde som er svært ivrig etter å kjøpe seg eit par svært dyre ski. Du veit at kunden er ein som trener vanleg, og at han slett ikkje vil ha meir nytte av dette dyre skiparet enn av eit par ski som kostar berre ein firedel. Kva gjer du?