Koking og damping av kjøt

Stykkingsdelar frå frampart eller seige delar frå bakparten er stykke som eignar seg godt til koking. Koketida varierer alt etter kor stort stykke kjøt du har, og kor seigt det er.

Framgangsmåte for koking av kjøt

Berekn ca. 1,5 liter vatn og 2 ts salt per kg kjøt.

• Del kjøtet i serveringsstykke og legg det i kokande vatn eller kraft tilsett salt.
• Kok opp og skum av.
• Du kan gjerne tilsetje grønsaker (dei fire store) i grove bitar saman med litt heil pepar og ein krydderkvast.
• La kjøtet trekkje til det er mørt. Kjøtet skal ikkje fosskoke, då blir det tørt og hardt. Kjøtet er ferdig når det losnar frå beina.
• Ta opp kjøtet med ei hòlsleiv og sil krafta. Ho kan du nytte til saus eller suppe.

Damping av kjøt kan gjerast i ein kombiomn eller i ein kjele med rist. Dampkoking vil seie at kjøtet blir kokt i vassdamp i staden for i kokande væske. Damping av kjøt nyttar vi som oftast til tillaging av pinnekjøt og forbehandling av ribbe, men vi kan òg nytte det til andre retter som steik, kjøtpudding, rull, tunge og anna røykt og salta kjøt.

Framgangsmåte for damping av kjøt i kjele

• Bruk ein kjele med rist og lokk.
• Fyll vatn (væske) opp til rista. Legg kjøtet på rista og ha lokk på.
• Damp til kjøtet er mørt og losnar frå beina.

I denne videoen får du sjå korleis du kan koke kjøt i ein kjele og dampe kjøt i kombiomn.