Fagartikkel
Omnsbaking av kjøt
Omnsbaking er ein av våre mest nytta tillagingsmetodar. Det meste kan bakast i omnen, men det er viktig å vere nøye med tid og temperatur for å få eit vellykka resultat.
Bilete: Sara Johannessen Meek / CC BY-NC 4.0
Når du skal lage kjøt eller fugl, vil du fort erfare at det mistar form under varmebehandling. Derfor surrar vi ofte kjøtet med hyssing eller legg det i netting for å behalde forma.
Steik og filet bør ha så jamn tjukn som mogleg for at heile kjøtet skal bli like mykje steikt. Filet og steik kan bindast opp med bomullstråd, og steik kan vi òg ha i strømpe for jamnare steiking.
- Temperer kjøtet ein halvtimes tid før steiking.
- Krydre kjøtet med salt og pepar og brun av kjøtet i ei varm steikjepanne.
- Legg kjøtet i ei form og set i eit steikjetermometer. Tilset gjerne grovt kutta grønsaker og litt kraft i forma. Då får du god kraft til å lage saus av.
- Steik kjøtet til den kjernetemperaturen du ønskjer. Hugs at kjernetemperaturen på store stykke kjøt vil stige nokre gradar mens det ligg og kviler.
- La kjøtet kvile 15–20 minutt før du skjer i det.
Langtidsbaking vil seie at kjøtstykke blir bakte i omnen på låg temperatur over lengre tid.
Fordelen med langtidsbaking er at vi kan nytte seige musklar til steiker. Desse er ofte billege og har mykje smak. Dessutan gir metoden lite steikjesvinn, som igjen fører til at steika blir saftig. Ulempa med metoden er at han tek lang tid.