Å bresere vil seie å koke eit kjøtstykke i væske under tett lokk i omnen. Det gjer at fukta blir halden på plass i kjelen, og du får eit veldig saftig, smakfullt og mørt kjøt. Det er òg bruken av væska som gjer at denne tillagingsmetoden skil seg frå vanleg langtidssteiking i omn.
Kva kjøtstykke eignar seg til bresering?
Bresering blir nytta på kjøtstykke som har ein del bindevev og litt feitt på seg. Skank, bringe, nakke, høgrygg, bog og kjakar er døme på kjøtstykke som eignar seg til bresering. Kjøtet bør ikkje vere for magert, då kan det lett bli tørt når det blir varmebehandla så lenge.
Du kan anten nytte ei jerngryte med lokk, ei eldfast form eller ein gastronombakk med aluminiumsfolie over. Tida det tek å bresere kjøtet, er litt avhengig av kva stykke kjøt du nyttar og storleiken på det. Vanlegvis reknar vi 2–4 timar.
Framgangsmåte
- Reinskjer kjøtet og gni det inn med salt og pepar.
- Brun kjøtet godt i ei varm steikepanne.
- Reins og skyl grønsaker. Dei fire store: gulrot, løk, sellerirot og purreløk eignar seg godt, men vi kan òg tilsetje andre grønsaker etter smak og behag. Kutt grønsakene i mirepoix og brun dei i panna.
- Legg grønsakene i gryta eller forma du skal nytte, legg på kjøtstykket og hell over væske. Du kan nytte kraft og/eller vin.
- Tilset urter og krydder etter smak.
- Legg på lokk eller dekk forma med aluminiumsfolie, og breser kjøtet til det har vorte mørt.
- Krafta som er i gryta etter at du har bresert, blir silt, smakt til og nytta som saus.
Video
Her viser kokkane steg for steg korleis du kan bresere eit stykke kjøt.