Confitering

Å confitere kjem frå det franske ordet confire som betyr "å konservere", og i gamle dagar vart denne teknikken nytta for å forbetre haldbarheita på råvara. Det er ein tillagingsteknikk der ei råvare er laga til og teke vare på i feitt, gjerne sitt eige. I motsetning til fritering, der vi lagar til råvara i feitt ved høg varme over kort tid, lagar vi ved confitering til råvara på lågare temperatur over lengre tid.

Den meste kjende confit-retten er andeconfit, men òg ukurante kjøtstykke frå lam og okse fungerer godt. Teknikken gir veldig god smak som kan gi tradisjonelt kokekjøt ein ny og betre smak.

Vi kan òg confitere fisk, grønsaker og frukt.

Som nemnt vil kjøt laga i feitt ved låg varme gi fordelar for såkalla ukurante og seige kjøtråvarer. Anten det er i eige feitt eller om vi nyttar olje, kan vi med fordel tilsetje smak. Kvitløk, urter, heile krydder og sitrusskal er døme på smak vi kan tilsetje feittstoffet for å gi kjøtstykket betre smak.

Ved å nytte låg varme over lengre tid har vi betre kontroll på varmebehandlinga og sikrar ein god kvalitet på produktet.

Når vi tilfører råvara så mykje feitt, er det viktig å balansere smaksbiletet med syre i garnityr eller saus.