Oppgåve: fleirrettars meny

Denne oppgåva kan gjennomførast anten som gruppeoppgåve eller som individuell oppgåve. Faglærar avgjer kor mange rettar som skal lagast, og kor mange personar det skal lagast mat til.

Sjå filmen nedanfor, som beskriv ein seksrettars meny. Noter det viktigaste kokken seier om kvar rett. Legg merke til korleis retten ser ut, og korleis elementa er plasserte på tallerkenen.

Les artikkelen som høyrer til filmen. Du finn han under Relatert innhald.

Bruk det vedlagde oppskriftsheftet. Planlegg å lage nokre av eller alle seks rettane. Viss ikkje skulen har tilgang til alle råvarene, finn faglærar alternativ du kan nytte.

Lag rettane du har planlagt. Prøv å få dei til å likne mest mogleg på rettane i filmen. Faglærar avgjer kor mykje tid du har tilgjengeleg, og kor mange personar du skal lage mat til.

• Synest du rettane du laga, vart som beskrive i filmen/artikkelen?
• Kva for ein av rettane er du mest fornøgd med?
• Kva var det mest utfordrande ved å lage denne fleirrettars menyen?