Arbeid på skyljerom

Opne bilete i eit nytt vindauge

CC BY-NC-SA

Bilete: Dag Jenssen

Skyljerommet blir i sin heilskap rekna som eit ureint rom, men det skal vere tilrettelagt for både reint og ureint arbeid. Rommet skal vere formålstenleg organisert i ei rein og ei urein side med tydeleg merking, slik at ein kan halde dei ulike prosedyrane skilt. Det er vanleg at ein tilsett i løpet av kvar vakt har hovudansvaret for at benker, handtak og andre flater med hyppig berøring i rommet blir desinfiserte. I tillegg har alle medarbeidarar eit felles ansvar for at rommet blir halde reint og ryddig, at skitent utstyr blir vaska, og at reint utstyr blir sett på plass i skap.

Når reint og ureint utstyr blir halde skilt, blir risikoen for å overføre mikroorganismar frå det ureine til det reine redusert. Det betyr til dømes at skitent sengeklede ikkje må leggast på golv eller på den reine benken i skyljerommet, men puttast rett i behaldaren for skitne tekstil. Viss du unngår å veksle fram og tilbake mellom reine og ureine prosedyrar, bidreg du til å redusere risikoen for overføring ytterlegare. Fordi skyljerommet blir rekna som ureint, skal døra inn til rommet haldast lukka.

Det skal alltid utførast handhygiene umiddelbart før arbeid på rein side av skyljerommet og før handtering av reint utstyr. På benken på rein side kan ferdig vaska utstyr leggast til tørk før det blir plassert inn i skap, men vi bør unngå at utstyr blir liggande på benken lenge. Oppbevaring av utstyr på benken aukar faren for kontaminering, og reint utstyr som skal vere lagra på skyljerommet, vil vere best verna inne i skap med lukka dør. Utstyr av harde materiale som metall og hardplast kan om nødvendig bli tørka av med papir etter reingjering før det blir plassert inn i skap for lagring.

Fordi rommet blir rekna som ureint, bør oppbevaring av utstyr på skyljerom generelt haldast på eit minimum. Det er sjeldan at den som set i gang ein vask i dekontaminatoren, har tid til å vente til maskina har vaska ferdig. Derfor er det viktig at alle samarbeider om å halde rommet ryddig, og at alle tek ansvar for oppgåver dei ser at må gjerast på skyljerommet.

Når vi utfører arbeid på urein side av skyljerommet, skal vi nytte eingongshanskar. I tillegg er det tilrådd å bruke plastforkle eller anna form for vern av uniforma. Ureine prosedyrar som blir utførte på eit skyljerom, er til dømes prøvetaking av urin og avføring. Brukte bekken, urinflasker, vaskefat og anna fleirgongsutstyr blir òg reingjorde her. I tillegg er det vanleg med avfallshandtering og oppbevaring av ureine tekstil som sengeklede, handkle og klutar.

Reingjering av fleirgongsutstyr som vaskefat og bekken føregår i ein bekkenspylar eller i ein instrumentsvaskar. Samlenemninga for desse to maskinene er dekontaminator. Dekontaminatoren kan ikkje handtere inntørka søl på ein formålstenleg måte. Ureint utstyr skal derfor reingjerast så raskt som mogleg. For at utstyret skal bli reint, er det òg viktig at det er plassert inn i dekontaminatoren på riktig måte. Derfor bør det vere ein rettleiar for plassering av utstyr lett synleg i nærleiken av dekontaminatoren.

Når søppel- og tøysekkar er fulle, må dei lukkast på forsvarleg måte og plasserast der dei blir henta for destruksjon eller vask. Det er vanleg at sekkane skal vere ¾ fulle når dei blir lukka og bytte ut med ny tom sekk. Dei skal altså ikkje vere stappfulle, fordi det gjer det vanskeleg å lukke dei på ein formålstenleg måte.

Mellom urein og rein side på skyljerommet bør det vere ein vask med handsåpe og handdesinfeksjonsmiddel. Etter handtering av ureint utstyr og arbeid på urein side skal vernforkle og eingongshanskar bli tekne av, og det skal utførast handhygiene. Når hendene er kontaminerte med biologisk materiale, skal vi alltid velje handvask. Det er ikkje nødvendig med både handvask og handsprit.