Slik skriv du ein rapport

Før du les

Sjå nærare på desse omgrepa før du les vidare:

Rapport

Ein rapport informerer om ei sak eller eit arbeid og dokumenterer kva som er gjort.

Rapporthovud

Eit rapporthovud inneheld informasjon om dato, mottakar, sendar og om kva rapporten handlar om.

Underskrift

Ei underskrift er fornamnet og etternamnet til den som har skrive eit dokument, til dømes ein rapport. Ved å setje namnet ditt under teksten godkjenner du det som står der.

Kva er ein rapport?

I filmen under (lengde 7:32) får du forklart kva som skal vere med i ein rapport.

Mange typar rapportar

I arbeidslivet bruker vi ofte rapportar for å vise kva vi har gjort. Til dømes kan du skrive ein arbeidsrapport for å forklare korleis du gjorde ein jobb. I naturfag kan du skrive ein forsøksrapport når du har gjort eit forsøk. Då forklarer du kva du gjorde, og kva som skjedde.

Krav til ein rapport

Den som les ein rapport, forventar presis og rett informasjon om ei sak eller ei hending. I rapportar må du derfor alltid vere nøyaktig med tid, stad og namn. Du må skrive sakleg og ganske kort, men samtidig passe på at alle viktige opplysningar er med. Du skal skrive rapporten i første person: eg eller vi.

Korleis skal du setje opp rapporten?

Rapportar kan ha litt ulike delar, alt etter kva slags rapport du skal skrive. Det er derfor viktig at du tilpassar rapporten ut frå rapporttypen. Dette gjeld både rapportar du skriv i ulike fag i skulen, og rapportar som du skriv i jobb og praksis. Her får du eit eksempel på korleis ein enkel rapport ser ut:

• Ulykkesrapport modelltekst (DOCX)

Rapporthovud

Du begynner med eit rapporthovud. Eit rapporthovud har med

• dato for den dagen du skriv rapporten

• kven som skal ha rapporten (mottakar)

• kven som har skrive rapporten (sendar)

• kva rapporten handlar om

Innleiing

Innleiinga skal gi ei kort oversikt over kva rapporten handlar om. I innleiinga til ein ulykkesrapport skal du til dømes skrive om kva situasjon ulykka skjedde i.

Hovuddel

I hovuddelen skriv du all faktainformasjon som du meiner det er viktig å ha med for å dokumentere saka. I ein ulykkesrapport er det naturleg å dokumentere kva som skjedde før ulykka, i hovuddelen.

Avslutning

Som avslutning kan du komme med di eiga vurdering dersom du blir beden om det. I ein ulykkesrapport er det til dømes vanleg å skrive kva du kan gjere for å hindre at ei slik ulykke skjer igjen.

Når rapporten er ferdig, må du hugse å skrive under for hand. Underskrifta di viser at du godkjenner innhaldet.