Feltarbeid: Kva ytre krefter har forma nærområdet?
Oppgåve: Undersøk arbeidet til elva i nærområdet
Jobb i grupper på to–fire elevar
1. Forarbeid
Før de set i gang med sjølve gjennomføringa av feltarbeidet, er det nødvendig å gjere nokre førebuingar.
Studer kart
Studer først eit kart over landskapet der de bur, eller i nærleiken av skulen. Bruk kartapplikasjonen nedanfor til å undersøke om det finst ei elv eller ein større bekk tilgjengeleg i nærområdet, som de kan undersøke nærare. Hugs at de kan endre på kartlaga.
Les artiklar og diskuter kva de skal undersøke
Kva som kan vere aktuelt å undersøke i felt, vil variere frå stad til stad. Kvar gruppe les gjennom desse fagartiklane:
Diskuter i gruppa og i klassen: Kva kan vere aktuelt å undersøke i nærområdet dykkar? Sjå forslag i boksen nedanfor. Gruppene vel eitt eller fleire punkt som dei ønsker å fokusere på i feltarbeidet sitt.
Forslag til kva som kan undersøkast i felt:
spor etter elveerosjon
spor etter transport av lausmassar i elva
spor etter avsetningar frå elva
finne døme på landformer danna av elva
måle vasshastigheita i elva
menneskeleg påverknad
Lag ei problemstilling og planlegg feltarbeidet
Når de har bestemt kva de vil undersøke, lagar de ei passande problemstilling. Planlegg kva som må til for å svare på denne problemstillinga:
gjennomføring (tid og stad)
metodar (kartlegging, dokumentasjon, målingar, loggføring)
klargjering av nødvendig utstyr for å samle inn data (skrivesaker, kart, kamera, stoppeklokke, måleband og så vidare)
fordeling av ansvar (kven gjer kva i felt)
La faglærar sjå over og godkjenne gruppa sin plan for gjennomføring av undersøkingar i felt.
2. Gjennomføring i felt
Gjennomfør undersøkingar i felt i ein skuletime (eller fleire skuletimar, dersom det er mogleg). Dra saman med resten av klassen og faglæraren. Hugs nødvendig utstyr.
Gruppa samlar inn data for å svare på problemstillinga si. Diskuter observasjonar de gjer.
Spør gjerne læraren dykkar om hjelp dersom de synest det er vanskeleg å komme i gang.
Tips: Ta gode notat, diskuter og dokumenter observasjonar mens de er i felt. Det vil gjere etterarbeidet mykje enklare.
3. Etterarbeid
Ikkje vent for lenge med etterarbeidet! Sjå gjennom innsamla data (notat, målingar, bilete, filmar), og diskuter i gruppa kva observasjonar de har gjort. Har de funne svar på problemstillinga dykkar?
Presenter resultat frå observasjonar som de har gjort i felt, på ein av følgande måtar:
munnleg presentasjon med framvisning av bilete/film og observasjonar som er gjorde
film som viser gjennomføring av arbeidet og kva observasjonar som er gjorde
plakat eller veggavis som kan hengast opp i klasserommet
skriftleg feltrapport eller innlevering