Landskapet rundt oss

Før du byrjar med oppgåva, bør du ha jobba med artikkelen "Ytre krefter formar landskapet". Det vil òg hjelpe å ha litt kunnskap om korleis is og elver formar landskapet. Det får du ved å lese artikkelen "Slik arbeider isbreen" og artikkelen "Slik arbeider elva".

Å sjå geografisk

Skal ein meistre det å sjå geografisk, må ein opparbeide seg ein del kunnskap over tid, men det fine er at ein ikkje treng så mykje kunnskap for å øve.

I denne oppgåva blir du presentert for ei rekke bilete av naturlandskap frå ulike stader i Noreg. Du skal prøve å forklare kvifor det ser ut som det gjer på bileta.

Oppgåva passar best å løyse i grupper på to–fire personar, men du kan òg løyse ho åleine.

Når ein skal svare på store spørsmål, kan det vere lurt å dele dei opp i nokre mindre spørsmål. Her er derfor nokre spørsmål du kan ta utgangspunkt i:

1. Ser du nokre teikn etter erosjon eller avsetjing i biletet?

2. Kva slags ytre kraft trur du har forma landskapet i biletet?

3. Kjenner du igjen nokre konkrete landformer i biletet?